پرەزيدەنتتىڭ ءباسپاسوز-حاتشىسى نۇرمۇحامەد بايعاراەۆ دەنساۋلىق جاعدايىنا بايلانىستى لاۋازىمىنان بوساتىلدى. بۇل تۋرالى ول Facebook پاراقشاسىندا جازدى، دەپ حابارلايدى “ادىرنا” ۇلتتىق پورتالى.
“كەشە دەنساۋلىعىما قاتىستى وقىس جاعدايدان سوڭ (پريستۋپتار) دارىگەرلەرگە تەكسەرىلۋگە ءماجبۇر بولدىم. تولىق تەكسەرىستەن كەيىن سىرقاتتىڭ بەلگىسى بايقالدى. دارىگەرلەر ۇزاقمەرزىمدى ەم-دومدى بىردەن باستاۋدى، ونى تۇراقتى قابىلداۋدى جانە باستىسى – ۇشاقپەن ۇشۋدى بەلگىلى ءبىر ۋاقىتقا دەيىن توقتاتۋدى تالاپ ەتتى.
مەديتسينالىق تالاپ قازىرگى قىزمەتىمدى تولىققاندى اتقارۋعا كەدەرگىسىن كەلتىرەتىنى بەلگىلى. سەبەبى ايماقتارعا جانە شەتەلدەرگە ءىس-ساپارلار تۇراقتى تۇردە بولادى. بۇل – ءجيى ۇشاقپەن ۇشۋ دەگەن ءسوز.
شىنى كەرەك، مۇندايدى ءوزىم دە كۇتپەدىم. جوسپار باسقاشا ەدى. وتكەن اپتادا كىرىسكەن قىزمەتىمە بىلىمىممەن، بىلىكتىلىگىممەن دايىن ەدىم. ءباسپاسوز قىزمەتىن جەتىلدىرۋگە، ودان ءارى اشىق ەتۋگە قاتىستى بىرنەشە يدەيا، باستامالارىم بار ەدى.
الايدا «دەنساۋلىق – ءبىرىنشى بايلىق» دەپ بەكەر ايتپاعان. سوندىقتان قانداي قىزمەت بولسا دا، ەڭ الدىمەن، ۋاقىت وتكىزبەي، تولىق ەمدەلىپ الۋ قاجەت دەپ تاپتىم. وسىعان وراي، پرەزيدەنت ءباسپاسوز حاتشىسى قىزمەتىن قازىر توقتاتا تۇرۋىما تۋرا كەلەدى”، دەپ جازدى ول.
ايتا كەتەيىك، ءبىر اپتا بۇرىن نۇرمۇحامەد بايعاراەۆ قازاقستان رەسپۋبليكاسى پرەزيدەنتىنىڭ ءباسپاسوز حاتشىسى لاۋازىمىنا تاعايىندالعان ەدى.
