فوتو: قورعانىس مينيسترلىگى
قازاقستاننىڭ قورعانىس ءمينيسترى داۋرەن قوسانوۆ قىزمەتىنەن بوساتىلدى. ءتيىستى جارلىققا 27 قىركۇيەكتە پرەزيدەنت قاسىم-جومارت توقاەۆ قول قويدى، دەپ حابارلايدى “ادىرنا”.
“مەملەكەت باسشىسىنىڭ جارلىعىمەن داۋرەن جۇماتايۇلى قوسانوۆ قازاقستان رەسپۋبليكاسىنىڭ قورعانىس ءمينيسترى لاۋازىمىنان بوساتىلدى”، دەلىنگەن حابارلامادا.
داۋرەن قوسانوۆ 1969 جىلى پاۆلودار وبلىسىندا دۇنيەگە كەلگەن. ارماۆير جوعارى اسكەري اۆياتسيالىق ۇشقىشتار ۋچيليششەسىن، يۋ.ا. گاگارين اتىنداعى اسكەري-اۋە اكادەمياسىن جانە رەسەي فەدەراتسياسى قارۋلى كۇشتەرى باس شتابىنىڭ اسكەري اكادەمياسىن تامامداعان.
اسكەري قىزمەتىن ۇشارالداعى جويعىش اۆياتسيا پولكىندە ۇشقىش-يسترەبيتەل بولىپ باستاپ، ءار جىلدارى تالدىقورعان جانە شىمكەنت قالالارىنداعى اۆيابازالاردى باسقارعان، اسكەري-اۋە كۇشتەرىن جانە اۋە قورعانىسى كۇشتەرىنىڭ اسكەري ينستيتۋتىن باسقارعان.
2022-2024 جىلدارى قازاقستان قارۋلى كۇشتەرى اۋە قورعانىسى كۇشتەرىنىڭ باس قولباسشىسى بولىپ، 2024-2025 جىلدارى قورعانىس ءمينيسترىنىڭ ورىنباسارى - اۋە قورعانىسى كۇشتەرىنىڭ باس قولباسشىسى قىزمەتىن اتقاردى.
قوسانوۆ العاش رەت 2025 جىلى قازاقستاننىڭ قورعانىس ءمينيسترى بولىپ تاعايىندالعان بولاتىن.
ەسكە سالايىق، 24 قىركۇيەكتە ماڭعىستاۋ وبلىسىندا قازاقستان قارۋلى كۇشتەرى اسكەري-تەڭىز كۇشتەرىنىڭ "حازار قورعانى - 2026" وقۋ-جاتتىعۋى كەزىندە 17 اسكەري قىزمەتشىنى تەڭىز اعىزىپ اكەتكەن. ولار كاسپي جاعالاۋىندا وقۋ-جاۋىنگەرلىك تاپسىرما ورىنداپ جاتقاندا اۋا رايى كۇرت ناشارلاپ، جەل كۇشەيگەن.
قورعانىس مينيسترلىگىنىڭ مالىمەتىنشە، 14 اسكەري قىزمەتشى قازا تاۋىپ، ۇشەۋى قۇتقارىلدى.
قايعىلى وقيعادان كەيىن 25 قىركۇيەك قازاقستاندا جالپىۇلتتىق ازا تۇتۋ كۇنى بولىپ جاريالاندى.
وقيعاعا بايلانىستى قىلمىستىق ءىس قوزعالىپ، تەرگەۋ امالدارى جۇرگىزىلىپ جاتىر. قىلمىستىق ءىس قىزمەتكە سالعىرت قاراۋ جانە كورابل جۇرگىزۋ قاعيدالارىن بۇزۋ فاكتىلەرى بويىنشا تەرگەلۋدە.
تەرگەۋ اياسىندا قازاقستان رەسپۋبليكاسى قارۋلى كۇشتەرىنىڭ جوعارى جانە اعا كوماندالىق قۇرامىنداعى جاۋاپتى لاۋازىمدى تۇلعالار ۇستالدى. ولار اۋىر زارداپتارعا اكەپ سوققان قىلمىستىق قۇقىق بۇزۋشىلىقتار جاسادى دەگەن كۇدىككە ءىلىندى.
ول العاش مينيستر بولىپ 2025 جىلى ماۋسىمدا تاعايىندالعان. ال جاڭا كونستيتۋتسيادان كەيىن قايتا تاعايىندالعانىنا 1 اي تولعان جوق.
