بۇگىن جازۋشى، كينودراماتۋرگ، قازاقستاننىڭ ەڭبەك سىڭىرگەن قايراتكەرى، قازاقستان مەملەكەتتىك سىيلىعىنىڭ جانە قازاقستان جازۋشىلار وداعى سىيلىعىنىڭ لاۋرەاتى، بەلگىلى قالامگەر اكىم ءۇرتايۇلى (اكىم تارازي) ءاشىموۆتىڭ تۋعان كۇنى. قالامگەر 90 جاستىڭ بەلەسىنە ورلەدى، تولدى، دەپ حابارلايدى "ادىرنا" ۇلتتىق پورتالى.
جازۋشى الماتى قالاسىندا تۋعان. اباي اتىنداعى قازاق پەداگوگيكا ينستيتۋتىنىڭ فيلولوگيا فاكۋلتەتىن، ماسكەۋدەگى ستسەناريستەردىڭ جوعارى كۋرسىن بىتىرگەن.
ەڭبەك جولىن ورتا مەكتەپ مۇعالىمى بولىپ باستاعان. 1956-1958 جىلدارى - «ارا» جۋرنالىنىڭ ادەبي قىزمەتكەرى. 1958-1959 جىلدارى - «قازاقستان پيونەرى» (قازىرگى «ۇلان») گازەتىنىڭ جاۋاپتى حاتشىسى. 1962-1970 جىلدارى - «قازاقفيلم» كينوستۋدياسى رەداكتسيالىق القاسىنىڭ مۇشەسى، باس رەداكتورى. 1970-1971 جىلدارى - «ليتەراتۋرنايا گازەتانىڭ» قازاقستان بويىنشا مەنشىكتى ءتىلشىسى. 1971-1980 جىلدارى كينەماتوگرافيستەر وداعى باسقارماسىنىڭ ءبىرىنشى حاتشىسى. 1986-1998 جىلدارى قازاقستان جازۋشىلار وداعىنىڭ حاتشىسى بولعان. جازۋشىنىڭ العاشقى كىتابى «قۇيرىقتى جۇلدىز» پوۆەسى 1966 جىلى جارىق كوردى. ودان بەرى «ۇلكەن اۋىل»، «اسۋ-اسۋ»، «قيان-سوقپاق»، «بۇلتقا سالعان ۇياسىن»، «تاسجارعان»، «قىز ماحابباتى»، «گنەزدو نا وبلاكاح»، «جۋراۆلي-جۋراۆۋشكي»، «باسىنان قاراتاۋدىڭ...»، «كەن»، «ءتاج» پوۆەستەرى، اڭگىمەلەرى، روماندارى جاريالاندى. سونداي-اق «كۇلمەيتىن كومەديا»، «جاقسى كىسى»، «جولى بولعىش جىگىت»، «قوس بوزداق»، ت.ب. پەسالاردىڭ، «تۇلپاردىڭ ءىزى»، «ارمان اتامان»، «قاراش-قاراش وقيعاسى»، «مۇستافا شوقاي»، ت.ب. كينوفيلم ستسەناريلەرىنىڭ اۆتورى. بىرقاتار كىتاپتارى شەت ەل تىلدەرىنە اۋدارىلعان. «قۇرمەت» وردەنىمەن ماراپاتتالعان.
توقسان جاسقا كەلۋىنە وراي مەملەكەتتىك كەڭەسشى ەرلان قارين ارنايى قۇتتىقتاپ، جازۋشىعا شاپان جاپتى.
- اكىم تارازي جامپوز جازۋشى عانا ەمەس، دارىندى دراماتۋرگ، ۇلتتىق كينونىڭ كەلىستى كەلبەتىن قالىپتاستىرعان قالامگەر. ءبىر سوزبەن ايتقاندا، قازاقستان مادەنيەتىن وركەندەتۋگە ۇلكەن ۇلەس قوسقان تۇلعا.
بۇگىن اكىم اعانى مەرەيتويىمەن قۇتتىقتاپ، مەملەكەت باسشىسى قاسىم-جومارت توقاەۆتىڭ قۇتتىقتاۋىن جەتكىزدىم. ءبىز ۇيىنە كىرگەندە قارت جازۋشى دومبىرا شەرتىپ، باياۋ ءان ايتىپ وتىر ەكەن. توقساننىڭ تورىنە شىققان اقساقالدىڭ ەرتە ويانىپ، سەرگەك وتىرعانىن كورگەندە، شىن تەبىرەندىك. كوڭىلى كىرشىكسىز، نيەتى اق، ادامزاتتىڭ بارلىعىن باۋىرىم دەپ بىلەتىن ابزال ادام ءدال وسىنداي بولسا كەرەك، - دەدى ەرلان قارين.
"ادىرنا" ۇلتتىق پورتالىنىڭ ۇجىمى دا جازۋشىعا ۇزاق عۇمىر، مىقتى دەنساۋلىق پەن كەنىش كوڭىل تىلەيدى. جاساي بەرىڭىز، ادەبيەت الەمىنىڭ اكىمى!
ۆيدەودا سازگەر نۇركەن ءاشىروۆتىڭ اكىم ءتارازيدىڭ شاڭىراعىندا كۇي شەرتۋ ءساتى.
"ادىرنا" ۇلتتىق پورتالى
