Búgin jazýshy, kınodramatýrg, Qazaqstannyń eńbek sińirgen qaıratkeri, Qazaqstan Memlekettik syılyǵynyń jáne Qazaqstan Jazýshylar odaǵy syılyǵynyń laýreaty, belgili qalamger Ákim Úrtaıuly (Ákim Tarazı) Áshimovtiń týǵan kúni. Qalamger 90 jastyń belesine órledi, toldy, dep habarlaıdy "Adyrna" ulttyq portaly.
Jazýshy Almaty qalasynda týǵan. Abaı atyndaǵy Qazaq pedagogıka ınstıtýtynyń fılologııa fakýltetin, Máskeýdegi senarısterdiń joǵary kýrsyn bitirgen.
Eńbek jolyn orta mektep muǵalimi bolyp bastaǵan. 1956-1958 jyldary - «Ara» jýrnalynyń ádebı qyzmetkeri. 1958-1959 jyldary - «Qazaqstan pıoneri» (qazirgi «Ulan») gazetiniń jaýapty hatshysy. 1962-1970 jyldary - «Qazaqfılm» kınostýdııasy redakııalyq alqasynyń múshesi, bas redaktory. 1970-1971 jyldary - «Lıteratýrnaıa gazetanyń» Qazaqstan boıynsha menshikti tilshisi. 1971-1980 jyldary Kınematografıster odaǵy basqarmasynyń birinshi hatshysy. 1986-1998 jyldary Qazaqstan Jazýshylar odaǵynyń hatshysy bolǵan. Jazýshynyń alǵashqy kitaby «Quıryqty juldyz» povesi 1966 jyly jaryq kórdi. Odan beri «Úlken aýyl», «Asý-asý», «Qııan-soqpaq», «Bultqa salǵan uıasyn», «Tasjarǵan», «Qyz mahabbaty», «Gnezdo na oblakah», «Jýravlı-jýravýshkı», «Basynan Qarataýdyń...», «Ken», «Táj» povesteri, áńgimeleri, romandary jarııalandy. Sondaı-aq «Kúlmeıtin komedııa», «Jaqsy kisi», «Joly bolǵysh jigit», «Qos bozdaq», t.b. pesalardyń, «Tulpardyń izi», «Arman ataman», «Qarash-qarash oqıǵasy», «Mustafa Shoqaı», t.b. kınofılm senarııleriniń avtory. Birqatar kitaptary shet el tilderine aýdarylǵan. «Qurmet» ordenimen marapattalǵan.
Toqsan jasqa kelýine oraı Memlekettik keńesshi Erlan Qarın arnaıy quttyqtap, jazýshyǵa shapan japty.
- Ákim Tarazı jampoz jazýshy ǵana emes, daryndy dramatýrg, ulttyq kınonyń kelisti kelbetin qalyptastyrǵan qalamger. Bir sózben aıtqanda, Qazaqstan mádenıetin órkendetýge úlken úles qosqan tulǵa.
Búgin Ákim aǵany mereıtoıymen quttyqtap, Memleket basshysy Qasym-Jomart Toqaevtyń quttyqtaýyn jetkizdim. Biz úıine kirgende qart jazýshy dombyra shertip, baıaý án aıtyp otyr eken. Toqsannyń tórine shyqqan aqsaqaldyń erte oıanyp, sergek otyrǵanyn kórgende, shyn tebirendik. Kóńili kirshiksiz, nıeti aq, adamzattyń barlyǵyn baýyrym dep biletin abzal adam dál osyndaı bolsa kerek, - dedi Erlan Qarın.
"Adyrna" ulttyq portalynyń ujymy da jazýshyǵa uzaq ǵumyr, myqty densaýlyq pen kenish kóńil tileıdi. Jasaı berińiz, ádebıet áleminiń Ákimi!
Vıdeoda sazger Nurken Áshirovtyń Ákim Tarazıdiń shańyraǵynda kúı shertý sáti.
"Adyrna" ulttyq portaly
