مينيسترلىك: "قالامقاستاعى" اپات قىتاي كومپانياسى جۇمىسشىلارىنىڭ كىناسىنەن بولعان

1905
Adyrna.kz Telegram

قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى ماڭعىستاۋ وبلىسى "قالامقاس" كەنىشىندەگى اپاتقا قىتايلىق Si Bu كومپانياسى جۇمىسشىلارىنىڭ ونەركاسىپتىك قاۋىپسىزدىك ەرەجەلەرىن ساقتاماۋى سەبەپ بولعانىن حابارلادى. 2 مامىردا اپاتتى زەرتتەۋ كوميسسياسىنىڭ قورىتىندىسىمەن تانىستىرعان يندۋستريالدى دامۋ جانە ونەركاسىپتىك قاۋىپسىزدىك كوميتەتىنىڭ توراعاسىنىڭ ورىنباسارى نىعمەتجان ماقاجانوۆ نۇر-سۇلتاندا وتكەن جيىندا وسىلاي دەپ مالىمدەدى.

"ۇسىنىلعان ماتەريالداردى قاراستىرىپ، Si Bu ينجەنەرلىك بۇرعىلاۋ كومپانياسىنىڭ ۇڭعىمانى بۇرعىلاۋ كەزىندە ونەركاسىپتىك قاۋىپسىزدىك تالاپتارىن بۇزعانى، بۇل ءوز كەزەگىندە گاز بەن سۋدىڭ شىعۋىنا الىپ كەلگەنىن كوميسسيا انىقتادى. مەردىگەر ۇيىم Si Bu كومپانياسىنىڭ ۇڭعىمانى سالۋعا ارنالعان تەحنيكالىق جوبانى، مۇناي جانە گاز ۇڭعىمالارىن بەكىتۋ جونىندەگى ادىستەمەلىك نۇسقاۋلاردىڭ تالاپتارىن بۇزىپ، تسەمەنتتىڭ قاتايۋىن كۇتۋدىڭ بەلگىلەنگەن ۋاقىتىن ەسەپتەمەگەن، ۇڭعىمانىڭ ساعاسى ۋاقىتىنان بۇرىن اشىلعان" دەدى نىعمەتجان ماقاجانوۆ.

ونىڭ ايتۋىنشا، Si Bu "وسى ۇڭعىمانىڭ قۇرىلىسىن قاۋىپسىز جۇرگىزۋگە قاجەت بولعان وندىرىستىك باقىلاۋدى قامتاماسىز ەتپەگەن". ماقاجانوۆ بۇعان قوسا، كومپانيا قىزمەتكەرلەرىنىڭ ونەركاسىپتىك قاۋىپسىزدىك سالاسىندا قاجەتتى دارەجەدە ماماندانباعانىن دا جەتكىزدى.

كوميتەت باسشىسى اپاتتىڭ سەبەپتەرى مەن جاي-جاپسارى جازىلعان اكت جاسالىپ، "اپاتتىڭ الدىن الۋ شارالارى ازىرلەنگەنىن" ايتتى. تەرگەپ-تەكسەرۋ ماتەريالدارى قۇقىق قورعاۋ ورگاندارىنا بەرىلگەن.

25 ناۋرىزدا ماڭعىستاۋ وبلىسىنداعى "قالامقاس" كەنىشىندەگى ۇڭعىمالاردىڭ بىرىنەن ءورت شىعىپ، ءورت سوندىرۋشىلەر بىرنەشە كۇننەن كەيىن عانا ءورتتى سوندىرە العان.

بۇعان دەيىن الەۋمەتتىك جەلى قولدانۋشىلارى "قالامقاس" كەنىشىندەگى ءورت تۋرالى ۆيدەو تاراتىپ، اۋماقتىڭ ەكولوگيالىق جاعدايىنا الاڭداعان.

30 ناۋرىزدا كەنىش ماڭىنداعى اۋا، توپىراق جانە سۋ قۇرامىن زەرتتەگەن "ماڭعىستاۋمۇنايگاز" اق ماماندارىنىڭ زەرتتەۋ قورىتىندىسىن جاريالاعان ەنەرگەتيكا مينيسترلىگى "اۋادا لاستاۋشى زاتتاردىڭ جوعارى كونتسەنتراتسياسى انىقتالعان جوق" دەپ حابارلاعان.

"قالامقاس" كەنىشىن بارلاۋمەن - "ماڭعىستاۋمۇنايگاز" كومپانياسى اينالىسادى.

"ازاتتىق" راديوسى

 

پىكىرلەر