Qazaqstannyń ındýstrııa jáne ınfraqurylymdyq damý mınıstrligi Mańǵystaý oblysy "Qalamqas" kenishindegi apatqa qytaılyq Si Bu kompanııasy jumysshylarynyń ónerkásiptik qaýipsizdik erejelerin saqtamaýy sebep bolǵanyn habarlady. 2 mamyrda apatty zertteý komıssııasynyń qorytyndysymen tanystyrǵan ındýstrıaldy damý jáne ónerkásiptik qaýipsizdik komıtetiniń tóraǵasynyń orynbasary Nyǵmetjan Maqajanov Nur-Sultanda ótken jıynda osylaı dep málimdedi.
"Usynylǵan materıaldardy qarastyryp, Si Bu ınjenerlik burǵylaý kompanııasynyń uńǵymany burǵylaý kezinde ónerkásiptik qaýipsizdik talaptaryn buzǵany, bul óz kezeginde gaz ben sýdyń shyǵýyna alyp kelgenin komıssııa anyqtady. Merdiger uıym Si Bu kompanııasynyń uńǵymany salýǵa arnalǵan tehnıkalyq jobany, munaı jáne gaz uńǵymalaryn bekitý jónindegi ádistemelik nusqaýlardyń talaptaryn buzyp, ementtiń qataıýyn kútýdiń belgilengen ýaqytyn eseptemegen, uńǵymanyń saǵasy ýaqytynan buryn ashylǵan" dedi Nyǵmetjan Maqajanov.
Onyń aıtýynsha, Si Bu "osy uńǵymanyń qurylysyn qaýipsiz júrgizýge qajet bolǵan óndiristik baqylaýdy qamtamasyz etpegen". Maqajanov buǵan qosa, kompanııa qyzmetkerleriniń ónerkásiptik qaýipsizdik salasynda qajetti dárejede mamandanbaǵanyn da jetkizdi.
Komıtet basshysy apattyń sebepteri men jaı-japsary jazylǵan akt jasalyp, "apattyń aldyn alý sharalary ázirlengenin" aıtty. Tergep-tekserý materıaldary quqyq qorǵaý organdaryna berilgen.
25 naýryzda Mańǵystaý oblysyndaǵy "Qalamqas" kenishindegi uńǵymalardyń birinen órt shyǵyp, órt sóndirýshiler birneshe kúnnen keıin ǵana órtti sóndire alǵan.
Buǵan deıin áleýmettik jeli qoldanýshylary "Qalamqas" kenishindegi órt týraly vıdeo taratyp, aýmaqtyń ekologııalyq jaǵdaıyna alańdaǵan.
30 naýryzda kenish mańyndaǵy aýa, topyraq jáne sý quramyn zerttegen "Mańǵystaýmunaıgaz" AQ mamandarynyń zertteý qorytyndysyn jarııalaǵan energetıka mınıstrligi "aýada lastaýshy zattardyń joǵary konentraııasy anyqtalǵan joq" dep habarlaǵan.
"Qalamqas" kenishin barlaýmen - "Mańǵystaýmunaıgaz" kompanııasy aınalysady.
"Azattyq" radıosy
