"ديكي ارمان" مەن قايرات قۇدايبەرگەننىڭ ءىسى سوتقا بەرىلدى

تەرگەۋشىلەر «ديكي ارمان» دەگەن اتپەن تانىمال كريماۆتوريتەت ارمان جۇماگەلديەۆ پەن الماتى قالاسى ءماسليحاتىنىڭ دەپۋتاتى قايرات قۇدايبەرگەننىڭ ءىسىن سوتقا بەردى، - دەپ حابارلايدى "ادىرنا" سايتى.  قالالىق سوتتىڭ مالىمەتىنشە، سوتتالۋشىلار 2022 جىلدىڭ باسىندا الماتىدا بولعان قاڭتار وقيعاسى كەزىندەگى جاپپاي تارتىپسىزدىكتەردى ۇيىمداستىردى جانە وعان قاتىستى دەگەن كۇدىككە ىلىنگەن. ولاردان بولەك سوت الدىنا تاعى 40 ادام كەلدى. سوتتى سۋديا اسحات اشىربەكوۆ جۇرگىزەدى. ىشكى ىستەر مينيسترلىگىنىڭ مالىمەتىنشە، ارمان جۇماگەلديەۆ شەتەلدەن 2021 جىلدىڭ جەلتوقسان ايىندا كەلگەن جانە قاڭتار وقيعاسى كەزىندە الماتىدا بولعان. ول 2022 جىلدىڭ 7 قاڭتارىندا ارنايى وپەراتسيا بارىسىندا بەس ادامنان تۇراتىن قىلمىستىق توپپەن ۇستالدى. كۇدىكتىلەردەن ءارتۇرلى ماركالى جانە كاليبرلى ءتورت جارتىلاي اۆتومات، سونداي-اق ولارعا ارنالعان وق-دارىلەر، قىرلى قارۋلار مەن بروندالعان اۆتوكولىك تاركىلەندى. وسى ۋاقىت بويى ديكي ارمان قاماۋدا بولدى. الماتى قالاسى ءماسليحاتىنىڭ VII شاقىرىلىمىنىڭ دەپۋتاتى قايرات قۇدايبەرگەن وتكەن جىلدىڭ 22 ساۋىرىندە قاڭتار وقيعاسى بويىنشا ۇستالعان بولاتىن. سول كۇننەن باستاپ ول دا قاماۋدا وتىر. قۇدايبەرگەن تارتىپسىزدىكتى ۇيىمداستىردى جانە وعان قاتىستى دەگەن كۇدىككە ىلىنگەن. الدىن الا تەرگەۋ ونىڭ جۇماگەلديەۆپەن بىرگە الماتىداعى «قازاقستان» قوناقۇيىندە ادامداردى جيناعانىن انىقتادى. تەرگەۋشىلەردىڭ ايتۋىنشا، قايرات قۇدايبەرگەن ديكي ارماننىڭ توڭىرەگىنە توپتاسىپ، ونى قولداپ، بيلىككە ورتاق تالاپتار قويۋعا شاقىرعان، سونداي-اق ادامداردى 10 ادامنان تۇراتىن كامەرالارعا ءبولىپ، توپتاستىرۋدىڭ ايرىقشا بەلگىسى رەتىندە قولدارىنا اق باۋ بايلاۋدى تاپسىرعان.