مەملەكەت باسشىسى قاسىم-جومارت توقاەۆ «باتىل تويتارىس-2023» ستراتەگيالىق كوماندالىق-شتابتىق اسكەري وقۋ-جاتتىعۋ جيىنىنا باردى. جيىندا قازاقستان اسكەرىنىڭ الەۋەتىن تاماشالاپ، جاۋىنگەرلەرمەن جولىقتى، دەپ حابارلايدى "ادىرنا" ۇلتتىق پورتالى "اقورداعا" سىلتەمە كورسەتە وتىرىپ.
پرەزيدەنت - قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ باسشىلىعىمەن «جاعالاۋ» وقۋ-جاتتىعۋ پوليگونىندا «باتىل تويتارىس-2023» ستراتەگيالىق، اسكەري وقۋ-جاتتىعۋ جيىنى ءوتتى.
قاسىم-جومارت توقاەۆ وقۋ-جاتتىعۋ جيىنىنا باستان-اياق باقىلاۋ مۇناراسىنان كوز تىكتى.
اسكەري ءادىس-تاسىلدەر جايلى مەملەكەت باسشىسىنا گەنەرال-مايورلار بولات جوراباەۆ پەن الماز جۇماكەەۆ باياندادى. سونىمەن قاتار، قورعانىس وپەراتسياسى، دەسانتتىق شابۋىل اسكەرلەرىنىڭ ارەكەتىن تاپسىرلەدى.
دەسانتتىق-شابۋىلداۋ اسكەرلەرىنىڭ بريگادالىق-تاكتيكالىق توپتارى اۆياتسيانىڭ قولداۋدى، سونداي-اق قۇرلىق اسكەرلەرى جانە ارناۋلى وپەراتسيالار كۇشتەرىنىڭ بولىمشەلەرىمەن بىرلەسىپ، سۋدان ءوتۋ ارقىلى قارسى جاعالاۋداعى جاۋ شەبىن باسىپ الۋ جولدارىن كورسەتتى.
ال ارناۋلى وپەراتسيالار كۇشتەرى مەن ۇلتتىق ۇلان بولىمشەلەرى شارتتى جاۋ قولىنا وتكەن قاپشاعاي گەس-ءىن ازات ەتتى. توتەنشە جاعدايلار مينيسترلىگىنىڭ بولىمشەلەرى تەحنوگەندىك اپات سالدارىن جويۋمەن اينالىسىپ، حالىققا گۋمانيتارلىق كومەك كورسەتۋ مىندەتىن اتقاردى.
قارۋلى كۇشتەردىڭ باس شتابى ازىرلەگەن بىرىڭعاي جوسپار مەن ماقساتقا سايكەس اسكەرلەر وقۋ-جاتتىعۋ جيىنى وتەتىن اۋداندارعا ستراتەگيالىق تۇرعىدا قايتا توپتاستىرىلدى.
اتاپ ايتقاندا، اسكەري-تەڭىز كۇشتەرى اۆياتسيانىڭ جانە ارناۋلى وپەراتسيالار كۇشتەرىنىڭ قولداۋىمەن كاسپي تەڭىزى اكۆاتورياسىنداعى ەكونوميكالىق قىزمەت نىساندارىنىڭ قاۋىپسىزدىگىن قامتاماسىز ەتتى.
پرەزيدەنت بۇل وقۋ-جاتتىعۋ جيىندارى كۇردەلى گەوساياسي كەزەڭدە وتكىزىلىپ وتىرعانىنا نازار اۋداردى.
– بۇگىندە الەمدىك قورعانىس جۇيەسىندە اۋقىمدى وزگەرىستەر بولىپ جاتىر. قازىرگى ۇرىستاردىڭ ءادىس-تاسىلدەرى دە باسقا، اسىرەسە، گيبريدتىك سوعىس تۇرلەرى كەڭ تارالۋدا. شابۋىلدار اسكەري عانا ەمەس، اقپاراتتىق، پسيحولوگيالىق، ساياسي، ەكونوميكالىق جانە باسقا دا سيپات الۋى مۇمكىن. سوندىقتان قازاقستان ارمياسى كەز كەلگەن سىن-قاتەرگە دايىن بولۋى قاجەت. بۇل – زاماناۋي ءارى كاسىبي اسكەرگە قويىلاتىن باستى تالاپ. بىزدىڭ ءبىر عانا وتانىمىز بار. ول – قازاقستان. ەلىمىزدى، جەرىمىزدى، ازاماتتارىمىزدىڭ قاۋىپسىزدىگىن قامتاماسىز ەتۋ، ولاردى قورعاۋ – بارشامىزعا ورتاق قاسيەتتى پارىز! – دەدى قاسىم-جومارت توقاەۆ.
الماتى، قاراعاندى، سولتۇستىك قازاقستان جانە اباي وبلىستارىنداعى پوليگونداردا دا وسىنداي وقۋ-جاۋىنگەرلىك مىندەتتەر ورىندالعانى حابارلاندى.
"ادىرنا" ۇلتتىق پورتالى
