ءۇندىستان كۇنگە ۇشاتىن جاڭا كەمەنى ۇشىردى. ولار ايدىڭ وڭتۇستىك پوليۋسىنە جاقىن جەرگە قوندىراتىن اپپاراتتى ءساتتى قوندىرعان الەمدەگى ءبىرىنشى مەملەكەت بولعاننان كەيىن، ءبىر اپتادان كەيىن كۇنگە جاڭا ميسسياسىن جىبەردى.
Aditya-L1 عارىشتىق وبسەرۆاتورياسى - جەرگە ەڭ جاقىن جۇلدىزدى باقىلاۋ جانە كۇن جەلى سياقتى عارىشتىق اۋا رايى ەرەكشەلىكتەرىن زەرتتەۋ ءۇشىن ىسكە قوسىلدى.
بۇل كۇندى زەرتتەۋدىڭ العاشقى ميسسياسى ەمەس - NASA مەن ەۋروپالىق عارىش اگەنتتىگى (ESA) وسى ماقسات ءۇشىن بۇرىن وربيتالىق اپپاراتتاردى ورنالاستىرعان بولاتىن.
دەگەنمەن، Aditya-L1 ميسسياسىنىڭ قۇنى قانشا؟
ءۇندىستان ۇكىمەتى جوبانى 2019 جىلى ماقۇلداعان كەزدە ونىڭ قۇنى شامامەن 46 ميلليون دوللارعا باعالانعان.
ءۇندى عارىش اگەنتتىگى ازىرگە ناقتى شىعىنداردىڭ ەگجەي-تەگجەيلەرىن جاريالامادى. بۇل قۇرىلعى عارىشتا بەس جىلدان استام تۇرۋعا ارنالعان.
تەرەڭ عارىشتا ISRO ميسسيانىڭ ساپارىن ءارى قاراي جالعاستىرۋ ءۇشىن اۋىرلىق كۇشىن پايدالانىپ، قۋاتتىلىعى از زىمىرانداردى جىبەرۋدى ءجون كورەدى. بۇل ءادىس اي مەن مارس سياقتى جەرلەرگە جەتۋ ءۇشىن ۇزاعىراق ۋاقىت الاتىنىن بىلدىرەدى، بىراق ۇشىرۋ قۇنى اۋىر زىمىراندارعا قاراعاندا تومەن.
بۇل سالىستىرمالى تۇردە شەكتەۋلى بيۋدجەتتە جۇمىس ىستەيتىن ءۇندى عارىش اگەنتتىگىنە جاقىن ۋاقىتتا ۇلكەن جەتىستىكتەرگە جەتۋگە مۇمكىندىك بەردى.
وتكەن اپتادا ايدىڭ بەتىنە «چاندراياان-3» (سانسكريت تىلىندە ايدا) ۇشقىشسىز قوندى. بۇدان كەيىن ءۇندىستان ايعا ءساتتى قونعان اقش، رەسەي جانە قىتايدان كەيىنگى ءتورتىنشى ەل بولدى.
2014 جىلى ءۇندىستان مارس اينالاسىنداعى وربيتاعا عارىش اپپاراتىن شىعارعان العاشقى ازيالىق مەملەكەت بولدى. ال كەلەسى جىلى ول جەر وربيتاسىنا ءۇش كۇندىك ەكيپاجدىق ميسسياسىن شىعارۋدى جوسپارلاپ وتىر.
ءۇندى ەلى ۇنەمدەپ، كۇنگە كەمەسىن ۇشىرسا، قازاقستان 2005 جىلى 40 ملن اقش دوللارىنا «كوشپەندىلەر» ءفيلمىن تۇسىرگەن بولاتىن. ول تۋىندى ءالى كۇنگە دەيىن سىن ساداعىنا ءىلىنىپ، مويىندالماي كەلەدى. مۇندا كارتينانىڭ كوركەمدىك ساپاسىنان بۇرىن ەڭ اۋەلى ءتۇسىرىلىم بارىسىنداعى ەسەپسىز ىسىراپشىلدىق ءسوز بولادى.
