قازاقستاندا اقش ساۋدا مينيسترلىگىنىڭ ونەركاسىپ جانە قاۋىپسىزدىك بيۋروسىنىڭ سايتى بۇعاتتالدى. مادەنيەت جانە اقپارات مينيسترلىگىنىڭ مالىمەتىنشە، فيشينگپەن كۇرەس اياسىندا بۇعاتتالعان، دەپ حابارلايدى “ادىرنا” ۇلتتىق پورتالى.
سايت بىرنەشە كۇننەن بەرى جۇمىس ىستەمەي تۇر.
ايتا كەتسەك، بۇعان دەيىن سايت اقش ارمەنيا، قىرعىزستان، رەسەي جانە بەلارۋس ەلدەرىندەگى ەلۋدەن استام كومپانياعا شەكتەۋ قويعانى تۋرالى اقپارات جاريالاعان بولاتىن. ونى باسقا اقپارات قۇرالدارى كوشىردى. امەريكا بيلىگىنىڭ ايتۋىنشا، تىزىمگە ەنگەن كومپانيالار رەسەيدىڭ «اسكەري-قورعانىس كەشەنىنە قولداۋ كورسەتكەندەر». ءبىراز ۋاقىتتان كەيىن قازاقستانعا اقش قازىناشىلىق حاتشىسىنىڭ كومەكشىسى ەليزابەت روزەنبەرگ، ساۋدا ءمينيسترىنىڭ كومەكشىسى مەتتيۋ اكسەلرود جانە ۇلىبريتانيانىڭ سانكتسيالار بيۋروسىنىڭ ديرەكتورى دەۆيد ءريدتىڭ كەلگەنى تۋرالى اقپارات جاريالاندى.
25 ساۋىردە ولار استانادا كەزدەسۋ وتكىزدى. ۇلىبريتانيا مەن اقش رەتتەۋشىلەرى قازاقستاندى رەسەيگە سانكتسيالانعان تاۋارلاردى جەتكىزۋدەن ساقتاندىرعىسى كەلدى. ايتپەسە، كەيبىر قازاقستاندىق بانكتەر مەن كومپانيالارعا سانكتسيا سالۋعا ۋادە بەرىلدى.
كەزدەسۋدە اقش شەنەۋنىكتەرى قازاقستاننان رەسەيگە تاۋارلاردىڭ (تۇرمىستىق تەحنيكا مەن اۆتوكولىكتەردىڭ) قاتارلاس ەكسپورتى تۋرالى بۇرىننان بىلەتىنىن اشىق ايتتى.
مينيسترلىكتىڭ حابارلاۋىنشا، رەسپۋبليكانىڭ اقپاراتتىق الاڭىنا تۇراقتى تۇردە مونيتورينگ جۇرگىزىلەدى. وسى جۇمىس شەڭبەرىندە فيشينگتىك ينتەرنەت-رەسۋرستار انىقتالىپ، ولارعا قاتىستى "بايلانىس تۋرالى" زاڭنىڭ 41-1-بابىندا بەلگىلەنگەن تارتىپپەن قول جەتكىزۋدى شەكتەۋ شارالارى جۇزەگە اسىرىلادى.
26 ساۋىردە 21 فيشينگتىك رەسۋرس، سونىڭ ىشىندە bis.doc.gov سايتى بويىنشا قولجەتىمدىلىكتى شەكتەۋ تۋرالى ءتيىستى ەسكەرتۋ دايىندالىپ، ورىنداۋعا جولدانعان.
بۇقارالىق اقپارات قۇرالدارى مەن الەۋمەتتىك جەلىلەردەگى قازاقستاننىڭ رەسەيگە سانكتسيالاردى اينالىپ وتۋگە كومەكتەسكەنى سايتتىڭ بۇعاتتالۋىنا سەبەپ بولدى دەگەن مالىمدەمەلەر شىندىققا سايكەس كەلمەيدى، - دەپ جازىلعان حابارلامادا.
مينيسترلىكتەگىلەر باسقا مەملەكەتتىك ورگاندارمەن بىرلەسىپ bis.doc.gov ينتەرنەت-رەسۋرسىنىڭ قىزمەتىندەگى زاڭبۇزۋشىلىقتارعا قوسىمشا تەكسەرۋ جۇرگىزۋدى جوسپارلاپ وتىرعانىن مالىمدەدى.
ەگەر زاڭبۇزۋشىلىقتار بولماعان جاعدايدا كورسەتىلگەن ينتەرنەت-رەسۋرستى بۇعاتتاۋدى جويۋ بويىنشا شارالار قابىلدانۋى مۇمكىن، - دەپ مالىمدەدى ۆەدومستۆو.
