جابىق قالا. ەندى استاناعا كوشىپ كەلۋشىلەر سانى شەكتەلۋى مۇمكىن

دەرەكتەرگە سەنسەك، قازىر استانادا 1 ميلليون 367 مىڭ ادام تۇرادى. ونىڭ 52 پروتسەنتى – ايەل، 47 پايىزى – ەر ادام. ولاردىڭ ورتاشا جاسى – 30. قالاعا جۇمىس ىزدەپ كەلگەندەردىڭ كوبى قۇرىلىس سالاسىندا جۇمىس ىستەيدى. استانا قالاسىنىڭ ساۋلەت، قالا قۇرىلىسى جانە جەر قاتىناستارى باسقارماسى باسشىسىنىڭ ورىنباسارى ايان سماعۇلوۆ بۇدان ءبىر اي بۇرىن قالا حالقىنىڭ ارتۋىن قاتاڭ تۇردە شەكتەۋ ءتيىمدى شەشىمدەرگە اكەلمەيتىنىن ايتقان بولاتىن. 

- باس جوسپاردا كەلەشەكتە قالانىڭ دامۋىنا اسەر ەتۋى مۇمكىن ەكونوميكالىق، الەۋمەتتىك، ساياسي جانە وزگە دە فاكتورلاردى كەشەندى تالداۋ نەگىزىندە قالا ءومىرىنىڭ ىقتيمال تاۋەكەلدەرى مەن جاعىمسىز پروتسەستەرىن بارىنشا ازايتۋ ءۇشىن جوبالىق ۇسىنىستار ازىرلەنەدى. ونىڭ ىشىندە ەلورداداعى حالىق ءوسىمىنىڭ جوعارى قارقىنى ەسكەرىلەدى. ۇكىمەت استانا اكىمدىگىمەن بىرلەسىپ ەلوردادا كوشى-قون پروتسەستەرىن شەشۋدىڭ ۇتىمدى ادىستەرىن ىزدەۋ بويىنشا جۇمىس جۇرگىزىپ جاتىر. قاتاڭ شەكتەۋ جانە تىيىم سالۋ شارالارىن بەلگىلەۋ كوشى-قون اعىندارىن باقىلاۋدى شەشۋگە اكەلمەيدى.

ەستەرىڭىزگە سالا كەتەيىك، استاناعا كەلۋشىلەردى شەكتەۋ ماسەلەسى كولگىنوۆتىڭ كەزىندە دە "كوتەرىلگەنىن" جازعانبىز. زامانىندا التاي كولگىنوۆ تە باس قالاعا كوشىپ كەلۋشىلەر سانىنا شەكتەۋ ەنگىلۋى مۇمكىن ەكەنىن ايتقان. وعان باستى سەبەبى رەتىندە سۋ مەن جارىقتىڭ جەتپەيتىنىن ايتىپ، الەۋمەتتىك جانە ينجەنەرلىك ينفراقۇرىلىمعا مولشەردەن تىس كولەمدە اۋىر سالماق تۇسەتىنىن مالىمدەگەن. ال دەموگرافتار ميگراتسيانى رەتتەۋگە كەلگەندە استاناداعى حالىق سانىن شەكتەۋ ادام قۇقىقتارىن تاپتاۋمەن تەڭ ەكەندىگىن ايتادى.

"ادىرنا" ۇلتتىق پورتالى