مەملەكەت باسشىسى قاسىم-جومارت توقاەۆ ەلوردانى دامىتۋ ماسەلەلەرى جونىندە كەڭەس وتكىزدى. كەڭەستە استانا قالاسى ينفوراقۇرىلىمىن جەتىلدىرۋدى ءسوز ەتىپ، قالانىڭ وتكەن جىلۋ ماۋسىمىنا دايىن بولماعانىن ايتتى. سونىمەن قاتار شەنەۋنىكتەردىڭ ءوز ىسىنە جاۋاپكەرشىلىكپەن قارامايتىنىن سىنعا الدى. ينجەنەرلىك ينفراقۇرىلىمداردا كاسىبي مامانداردىڭ ەمەس، مۇلدەم باسقا ماماندىق وكىلدەرىنىڭ باسشىلىق ەتىپ وتىرعانىن مالىمدەدى، دەپ حابارلايدى "ادىرنا" ۇلتتىق پورتالى.
قاسىم-جومارت توقاەۆ ەلوردانى دامىتۋ ماسەلەلەرى جونىندە كەڭەستە بىرقاتار ماسەلەلەردى اتاپ ايتتى:
- ءبىرىنشى ماسەلە. استانانى جىلۋمەن قامتاماسىز ەتۋ جۇيەسى ورنىقتى بولۋى قاجەت. ەلورداداعى نەگىزگى وزەكتى ماسەلەلەر قالانىڭ دامۋىنا قاتىستى ءتيىستى جوسپاردىڭ، ياعني دۇرىس جوسپارلاۋ جۇمىسىنىڭ جوقتىعىنان تۋىنداپ وتىر. مۇنى اشىق ايتۋىمىز كەرەك. باقىلاۋسىز جۇرگىزىلىپ جاتقان قۇرىلىس، ساپادان گورى سانعا ءمان بەرۋ جانە جان-جاقتى ويلاستىرىلماعان شەشىمدەر قالاداعى ومىرلىك ماڭىزى بار ينفراقۇرىلىمنىڭ تاپشىلىعىنا الىپ كەلدى.
جاعدايدىڭ سونشالىقتى مۇشكىل بولۋىنا جاۋاپتى باسشىلاردىڭ بىلىكسىزدىگى نەمەسە باس پايداسىن ويلاعاندىعى سەبەپ بولدى. قالا باسشىلىعى قۇرىلىس كومپانيالارىنىڭ پايداسىن ەمەس، مەملەكەت پەن ازاماتتاردىڭ مۇددەسىن بارىنەن بيىك قويۋعا ءتيىس»، - دەدى توقاەۆ.
سونىمەن قاتار وتكەن جىلۋ ماۋسىمىنداعى قالا جاعدايىنىڭ قانداي بولعانىن ەسكە سالىپ ءوتتى:
"وتكەن جىلىتۋ ماۋسىمىندا ەلوردادا ايتارلىقتاي قيىندىقتار بولدى. قىس - جىلۋ قۋاتىنىڭ تاپشىلىعىمەن ءوتتى. جەرگىلىكتى بيلىك ميلليونداعان شارشى مەتر تۇرعىن ءۇيدىڭ قۇرىلىسىن جالعاستىرىپ جاتىر، الايدا ولار قالىپتى جىلۋمەن قامتاماسىز ەتۋ جۇيەسىنە تولىق دايىن ەمەس. قالانىڭ ينجەنەرلىك ينفراقۇرىلىمىن دامىتۋ كوبىنەسە كوممۋنالدىق كاسىپورىنداردى باسقاراتىن شەنەۋنىكتەردىڭ كاسىبيلىگىنە بايلانىستى.
جەڭىس ماحمۇدۇلى، جىل باسىندا سىزگە قالالىق كوممۋنالدىق كاسىپورىنداردىڭ باسشىلىق قۇرامىنا تالداۋ جۇرگىزۋ تاپسىرىلدى. بۇل تاپسىرما، مەنىڭ تۇسىنۋىمشە، ءالى دە ورىندالۋ ساتىسىندا. ەلوردادا جەو–نى زاڭگەر، رەك-ءتى – باعالاۋشى، جىلۋ ءترانزيتىن – اگرونوم، قالالىق سۋ ارناسىن - زووتەحنيك باسقارادى.
اركىم ءوز كاسىبىنە ساي قىزمەتپەن اينالىسۋى كەرەك ەكەنىنە تەرەڭ سەنىمدىمىن، - دەدى پرەزيدەنت.
توقاەۆ جيىن بارىسىندا جىلۋ ەلەكتر ورتالىقتارىن قايتا جاڭارتۋ مەن پايدالانۋعا بەرۋ ماسەلەسىن قاراستىردى. تەحنيكا مەن مامانداردىڭ جەتىسپەيتىندىگىن اشىق ايتتى.
استانا ەلىمىزدىڭ ىلگەرىلەۋىنىڭ لوكوموتيۆى بولىپ تابىلادى، سوندىقتان تۇراقتىلىق پەن ورنىقتى دامۋدىڭ ۇلگىسى بولۋعا ءتيىس. جالپى، ۇكىمەت بارلىق وڭىرلەردە جىلىتۋ ماۋسىمىنا دايىندىقتى باقىلاۋدا ۇستاۋى كەرەك. ەكىباستۇزداعىداي 30 گرادۋس ايازدا تۇرعىنداردىڭ جىلۋسىز قالعان جاعدايلارىن تاعى قايتالاۋعا جول بەرمەۋ كەرەك، - دەدى مەملەكەت باسشىسى.
"ادىرنا" ۇلتتىق پورتالى
