قازاقستان پرەزيدەنتى بۇۇ باس حاتشىسىنىڭ ارنايى وكىلى، ورتالىق ازيا بويىنشا پرەۆەنتيۆتى ديپلوماتيا جونىندەگى وڭىرلىك ورتالىقتىڭ باسشىسى كاحا يمنادزەنى قابىلدادى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
توقاەۆ كاحا يمنادزەنى جوعارى لاۋازىمعا تاعايىندالۋىمەن قۇتتىقتاپ، ونىڭ ورتالىق ازيا مەملەكەتتەرى مەن بۇۇ اراسىنداعى ىنتىماقتاستىقتى دامىتۋعا ەلەۋلى ۇلەس قوساتىنىنا سەنىم ءبىلدىردى.
مەملەكەت باسشىسى ورتالىق ازيا بويىنشا پرەۆەنتيۆتى ديپلوماتيا جونىندەگى وڭىرلىك ورتالىقتىڭ ماڭىزدىلىعى مەن قاجەتتىگىن اتاپ ءوتىپ، ونىڭ ايماقتاعى ورنىقتى ءوسىمدى قامتاماسىز ەتۋ، تۇراقتىلىق پەن قاۋىپسىزدىكتى نىعايتۋ ىسىنە ودان ءارى قولداۋ كورسەتۋگە دايىن ەكەنىن جەتكىزدى.
كاحا يمنادزە ورتالىق قىزمەتىنە قولداۋ كورسەتكەنى ءۇشىن قاسىم-جومارت توقاەۆقا العىس ايتىپ، قازاقستاننىڭ وڭىردەگى بەيبىتشىلىكتى نىعايتۋ جانە ديالوگتى ىلگەرىلەتۋ ىسىنە قوسقان ەلەۋلى ۇلەسىن اتاپ ءوتتى.
ودان بولەك، كەزدەسۋ بارىسىندا اۋعانستانداعى قازىرگى جاعداي تالقىلاندى.
