Qazaqstan Prezıdenti BUU Bas hatshysynyń arnaıy ókili, Ortalyq Azııa boıynsha preventıvti dıplomatııa jónindegi óńirlik ortalyqtyń basshysy Kaha Imnadzeni qabyldady. Bul týraly Aqorda málimdedi, dep habarlaıdy “Adyrna” ulttyq portaly.
Toqaev Kaha Imnadzeni joǵary laýazymǵa taǵaıyndalýymen quttyqtap, onyń Ortalyq Azııa memleketteri men BUU arasyndaǵy yntymaqtastyqty damytýǵa eleýli úles qosatynyna senim bildirdi.
Memleket basshysy Ortalyq Azııa boıynsha preventıvti dıplomatııa jónindegi óńirlik ortalyqtyń mańyzdylyǵy men qajettigin atap ótip, onyń aımaqtaǵy ornyqty ósimdi qamtamasyz etý, turaqtylyq pen qaýipsizdikti nyǵaıtý isine odan ári qoldaý kórsetýge daıyn ekenin jetkizdi.
Kaha Imnadze ortalyq qyzmetine qoldaý kórsetkeni úshin Qasym-Jomart Toqaevqa alǵys aıtyp, Qazaqstannyń óńirdegi beıbitshilikti nyǵaıtý jáne dıalogty ilgeriletý isine qosqan eleýli úlesin atap ótti.
Odan bólek, kezdesý barysynda Aýǵanstandaǵy qazirgi jaǵdaı talqylandy.
