ءماجىلىس دەپۋتاتتارى، Amanat پارتياسى فراكتسياسىنىڭ مۇشەلەرى ارمان قالىقوۆ، كۇدايبەرگەن بەكسۇلتانوۆ پەن نيكيتا شاتالوۆ «قازاقستان» شاحتاسىنداعى جاعدايمەن جانە جەدەل شتاب جۇمىسىمەن تانىستى. ماجىلىستەگى پارتيا فراكتسياسى العاشقى ساعاتتان-اق جاعدايدى ەرەكشە باقىلاۋدا ۇستاپ وتىر.
حالىق قالاۋلىلارى قايعىلى وقيعا ورنىندا «ارسەلور ميتتال تەمىرتاۋ» اق وكىلدەرىمەن كەلىسسوز جۇرگىزدى، سونداي-اق قازا تاپقان جانە جوعالىپ كەتكەن شاحتەرلەردىڭ وتباسىلارىمەن جانە كاسىپوداق وكىلدەرىمەن كەزدەستى.
«مەن وسى شاحتينسك قالاسىندا 45 جىل ءومىر ءسۇرىپ، اتالعان كومپانيادا 27 جىل جۇمىس ىستەدىم. وسى جانە وسىعان دەيىنگى اپاتتار كوز الدىمدا بولدى. بۇل – ۇلكەن قاسىرەت. مۇنداي اپاتتار ۇنەمى قايتالانادى. مەملەكەت پەن ۋاكىلەتتى ورگاندار تاراپىنان باقىلاۋدى كۇشەيتەتىن كەز كەلدى. سەبەبى كومىر ونەركاسىبى قازاقستاندا عانا ەمەس، بۇكىل الەمدە ەڭ قاۋىپتى سالا سانالادى. Amanat پارتياسى تەرگەۋ امالدارىن ءجىتى قاداعالاپ، قازا تاپقاندار مەن ولاردىڭ وتباسىلارى ءۇشىن ادىلدىك ورناتادى»، – دەدى ءماجىلىس دەپۋتاتى ارمان قالىقوۆ.Amanat پارتياسى كوزدەگەن باستى ماقساتتىڭ ءبىرى – بولاشاقتا وسىنداي وقيعالارعا جول بەرمەس ءۇشىن بارلىق جۇمىسشىعا سەنىمدى جاعداي جاساۋ.
«بۇل – 90-شى جىلدارى ميتتالعا سۋ-تەگىنگە بەرىلگەن ينفراقۇرىلىمعا نەمقۇرايدى قاراۋدىڭ سالدارى. اي مەن كۇننىڭ امانىندا وتانداستارىمىزدان ايىرىلىپ قالىپ جاتىرمىز. بۇدان بىلاي بۇعان جول بەرۋگە بولمايدى. بۇل جاعداي ارقايسىمىز، ءتىپتى تۇتاس حالقىمىز ءۇشىن ۇلكەن قاسىرەت. وكىنىشكە قاراي، مۇنداي اپاتتار كەلە-كەلە قالىپتى جاعدايعا اينالىپ، وعان ەتىمىز ۇيرەنىپ بارا جاتقانىن بايقاپ وتىرمىز. ءمايىت تابىلادى، سالدارى جويىلادى. وسىنداي وقيعالاردىڭ ۇنەمى قايتالانىپ وتىرعانىنا ۇيرەنىسىپ كەتتىك. كەلەسى كۇنى تۇك بولماعانداي، شاحتەرلەر تاعى ءوز ءومىرىن قاۋىپ-قاتەرگە تىگىپ، ادەتكى جۇمىسىنا كىرىسەدى. بۇعان توقتاۋ سالاتىن كەز كەلدى. جۇمىسشىلار لايىقتى جالاقى الىپ قانا قويماي، وتباسىنا امان-ەسەن ورالاتىنىنا سەنىمدى بولۋى كەرەك»، – دەدى دەپۋتات نيكيتا شاتالوۆ.
ۇقساس جاڭالىقتار
