سوڭعى كەزدەرى ەلىمىزدە ءدىني جاماعاتقا بولىنۋشىلىك ۇدەرىسى بەلەڭ العانى بايقالادى. بۇعان الەۋمەتتىك قۇبىلىس رەتىندە قاراۋعا بولار، الايدا ونىڭ ىشىندە الاسى دا، قۇلاسى دا بولاتىنى زاڭدىلىق. اسىرەسە، وزگە پيعىلداعى ءدىني جاماعاتتاردان قوعامعا قاۋىپ كوبىرەك. بۇگىنگى تالقى تاقىرىبىمىزدا دەسترۋكتيۆتى ءدىني جاماعاتتاردىڭ كوزدەگەنى مەن كوكسەگەنى نە ەكەنىن اشىپ ايتامىز.
دەسترۋكتيۆتى ءدىني جاماعاتتار بارلىق كەزەڭدە كوزدەگەنىنە جەتۋ ءۇشىن ەشتەڭەدەن تايىنباعان. ءدىندى قالاۋلارىنشا بۇرمالاپ، ءارتۇرلى ايلا-شارعىعا بارىپ وتىرعان. قوعامعا ىرىتكى سالۋدىڭ جولىن ىزدەپ، زۇلىمدىقتى اقتاۋعا تىرىسقان. بۇگىنگى تاڭدا ولاردان تونەتىن قاتەر كۇشەيمەسە، سەيىلگەن جوق. ارتىنان ەرۋشىلەردىڭ قاتارى كوبەيمەسە، كەمىگەن جوق.
جالپى دەسترۋكتيۆتى ءدىني جاماعاتتار ادامدار اراسىنداعى تۋىستىق، وتباسىلىق، باۋىرلاستىق قاتىناستاردى جوققا شىعارادى. ءوزارا ىمىراعا كەلۋگە مۇلدە تالپىنبايدى. ولارعا وزگەنى اداسقان دەۋ – الدەقايدا وڭاي. دەسترۋكتيۆتى جاماعاتتار ءاردايىم قاتارىن تولتىرىپ وتىرۋعا تالپىنادى. ول جولدا ادامداردى الداپ، ارباپ، وزدەرىن ءبىلىم بەرۋ، بيزنەس، مادەنيەت سالاسىنىڭ وكىلدەرى رەتىندە كورسەتۋگە تىرىسادى.
تەرىس پيعىلدىلار ەڭ الدىمەن ءوز جەمتىگىن تاڭداپ، ونىمەن جاقىنىراق تانىسۋدىڭ جولىن ىزدەيدى. وزدەرىن ادال، جاقسى ادامدارداي كورسەتەدى. ادامنىڭ دىنگە دەگەن قىزىعۋشىلىن وياتۋعا، ول ءۇشىن كومەك كورسەتىپ، جانىنان تابىلۋعا دايىن ەكەنىن جەتكىزەدى. وسىلايشا، جالعان دوستىق بايلانىس باستالادى. ال اربالۋشى ولاردىڭ شەكتەن تىس جاناشىرلىعىنا سەنىم بىلدىرە باستايدى. ونىڭ ءجۇرىس تۇرىسى ءاردايىم قاداعالانىپ، ءوز جاقىندارىنا جات بولعانشا ارەكەت وسىلاي جالعاسادى. كەز كەلگەن ماسەلەدە سولارعا جۇگىنەتىن حالگە جەتەدى. قوعامعا دەگەن جيىركەنىش سەزىمىن وياتىپ، ادامداردى اداسۋشىلار رەتىندە كورسەتىپ باعادى. وسىنداي پسيحولوگيالىق ەتاپتاردان وتكەن اربالۋشى ءوز ءومىرىن سول جاماعاتتىڭ مۇددەسىنە ارناۋعا دايىن تۇرادى. ءوزىم دەگەندى مۇلدە ۇمىتادى.
مىنە، سوندىقتان تەرىس پيعىلدىلاردىڭ قوعام ءۇشىن كەلتىرەر زالالىن ايتپاسا دا تۇسىنىكتى. بۇل ءوز كەزەگىندە ۇلتتىق قۇندىلىعىمزعادا كەرى اسەرىن تيگىزۋدە.
سول ءۇشىن ەلىمىزدەگى كۇماندى جانە دەسترۋكتيۆتى سيپاتتاعى «جاماعاتتاردىڭ» كوبەيۋىنە ساقتىقپەن قاراعانىمىز ابزال. ايتپەسە، بۇيرەكتەن سيراق شىعارۋعا ءازىر تۇرعانداردىڭ جوقتىعىنا كىم كەپىل؟! جات جاماعاتتاردان ساقتاۋدىڭ ەمەس، ساقتانۋدىڭ جولىن ىزدەگەنىمىز ءجون شىعار...
دىنگە قاتىستى سۇراق بولعان جاعدايدا تەك رەسمي ءدىن وكىلدەرى مەن بىلىكتى تەولوگتارعا جۇگىنگەن دۇرىس جانە قاۋىپسىز بولار.
