قىرعىزستان تاراپى سۋ بەرۋدى توقتاتتى. كەلىسىلگەن ليميت ءبىتتى دەيدى. كيروۆ سۋ قويماسىنان سۋ جىبەرەتىن ەدى. ەندى جامبىل وبلىسىنداعى ديقانداردىڭ جاعدايى قيىن، اسىرەسە قورداي اۋدانىنداعى ەگىنشىلەر قينالۋدا. جامبىل وبلىسىنىڭ 80 پايىز سۋى قىرعىزستاننان كەلەدى ەكەن.
قىرعىز تاراپى سۋدىڭ وزدەرىنە جەتپەي جاتقانىن ايتۋدا. جاعداي ءماز ەمەس.
جالپى سۋ تاپشىلىعى ەندى جىل سايىن ارتا بەرەدى. اسىرەسە، بىزدە. ءىرى وزەننىڭ بارلىعى دەرلىك ترانسشەكارالىق. ىلە، ەرتىس، شۋ، تالاس، جايىق، سىرداريا دەگەندەي. وزەننىڭ باستاۋى بىزدىكى ەمەس، ياعني وزەننىڭ سۋىن دا رەتتەي المايمىز. قىسىم رىچاگى وزگەلەردىڭ قولىندا.
كورشىلەس ەلدەر سۋ بەرۋدى ەندى ازايتا بەرەدى. بىرىنشىدەن وزدەرىنە دە سۋ جەتپەۋدە، مۇزدىقتار ەرىپ جاتىر. ەكىنشىدەن الەمدە، بىزدە جانە كورشىلەرىمىزدە حالىق سانى ارتۋدا، دەمەك شارۋاشىلىق سانى دا، ءوندىرىس وشاقتارى سانى دا كوبەيۋدە. سايكەسىنشە سۋدى قولدانۋ دا ارتا بەرەدى. وسىلايشا بىزگە كەلەتىن سۋ جىل سايىن ازايادى دەپ ويلايمىن. كەلىسسوزدەر ارقىلى ءليميتتى ارتتىرۋعا بولار، تەگىن ەمەس ارينە. بىراق ول ۋاقىتشا شارا.
اۋىل شارۋاشىلىعىندا جاڭا تەحنولوگيانى ەنگىزۋدى جىلدامداتۋ ماڭىزدى. تامشىلاتىپ سۋارۋ جانە باسقا دەگەندەي. ول سۋدى ۇنەمدەۋگە كومەكتەسەدى. شارۋالارعا سۋدى كوپ قاجەت ەتپەيتىن كوكونىس، ءداندى-داقىل سورتتارىن جەتكىزۋ قاجەت. بۇنىڭ بارلىعى ىزدەنىس پەن قىرۋار قارجىنى قاجەت ەتەدى. اۋىل شارۋاشىلىعى ەسكى جۇيەدە قالعان ەلدەردە سۋدى قيساپسىز پايدالانۋ بار. ارىقتارمەن مىڭداعان توننا سۋ بوسقا توپىراققا ءسىڭىپ كەتەدى.
بۇدان بولەك سۋ ساقتاۋ قويمالارىن ءار ايماققا سالۋ، ونى قىستا قار سۋىمەن تولتىرىپ، جازدا ەگىستىككە قولدانۋدى دا ماماندار ۇسىنۋدا. بۇل دا قىمبات، بىراق قاجەت دۇنيە. سۋ ۇنەمدەۋدى بالاباقشادان باستاپ بارلىق ادامعا ۇيرەتۋ دە ماڭىزدى. سارىلداتىپ سۋدى اعىزىپ قويىپ، ءوزى جايباراقات جۇرەتىن كەزەڭ كەلمەسكە اقىرىنداپ كەتۋى مۇمكىن.
بۇنىڭ بارلىعى دا ءجۇز رەت ايتىلعان، جازىلعان دۇنيە عوي. ءجۇز ءبىرىنشى رەت تاعى جازا سالايىن دەدىم.
ءبىزدى سۋعا بايلانىستى كورشى ەلدەرمەن الدا قيىن كەلىسسوزدەر كۇتىپ تۇر. ونىڭ ناتيجەسى دە ءوز ساياسي، اسكەري، ەكونوميكالىق سالماعىمىزعا بايلانىستى.
