قىرعىزستان پرەزيدەنتى سادىر جاپاروۆ قۇقىقتىق قامتاماسىز ەتۋ باسقارماسىنا ءولىم جازاسىن قايتارۋدى تاپسىردى. بۇل تۋرالى 1 قازاندا مەملەكەت باسشىسىنىڭ ءباسپاسوز حاتشىسى اسحات الاگوزوۆ ايتتى، دەپ حابارلايدى «ادىرنا» ءتىلشىسى.
«زاڭناماعا بالالار، قىزدار جانە ايەلدەرگە قارسى قىلمىستار ءۇشىن جازانى بارىنشا قاتاڭداتۋدى كوزدەيتىن وزگەرىستەر ەنگىزۋ بويىنشا تاپسىرما بەرىلدى. مەملەكەت باسشىسى بالالار مەن ايەلدەرگە قارسى جاسالعان قىلمىستار جازاسىز قالماۋى ءتيىس دەپ ەسەپتەيدى»، – دەدى ول.
بۇل شەشىمدى جاپاروۆ ىستىقكول وبلىسىندا 17 جاستاعى ايسۇلۋ ەسىمدى قىزدىڭ مەرت بولۋىنا بايلانىستى قابىلداعان. بويجەتكەن 27 قىركۇيەكتە جوعالىپ كەتكەن. قۇربىسىنا قوناققا بارعان قىز بايلانىسقا شىقپاي قالعان. كەيىن ونىڭ دەنەسى بووم شاتقالىنان تابىلدى.
كۇدىكتى رەتىندە 41 جاستاعى بىشكەك تۇرعىنى ۇستالىپ، ۋاقىتشا قاماۋ يزولياتورىنا جابىلدى. تەرگەۋ نۇسقاسىنا سايكەس، ەر ادام قىزدى زورلاپ، ارتىنشا ءولتىرىپ كەتكەن. ۇستالعان كۇدىكتى قىلمىسىن مويىندادى. بۇعان قوسا، ونىڭ بۇعان دەيىن توناۋ جانە كىسى ولتىرۋگە وقتالۋ قىلمىستارى ءۇشىن سوتتالعانى انىقتالدى.
ايتا كەتەيىك، قىرعىزستاندا ءولىم جازاسى 2007 جىلى كۇشىن جويعان ەدى. ال 2010 جىلعى جەلتوقساندا ەل ازاماتتىق جانە ساياسي قۇقىقتار تۋرالى حالىقارالىق پاكتىنىڭ ءولىم جازاسىن جويۋعا باعىتتالعان ەكىنشى فاكۋلتاتيۆتىك حاتتاماسىن راتيفيكاتسيالاعان.
