اقش-تىڭ بۇرىنعى پرەزيدەنتى دونالد ترامپقا دجوردجيا شتاتىندا ايىپ تاعىلدى، دەپ حابارلايدى “ادىرنا” ءتىلشىسى.
ەكس-پرەزيدەنتكە ۇلكەن قازىلار القاسى 2020 جىلعى پرەزيدەنتتىك سايلاۋ ناتيجەلەرىن قايتا قاراۋ ارەكەتىنە قاتىسى بولۋى مۇمكىن دەپ شەشتى. اقش-تىڭ 45-ءشى پرەزيدەنتىنە قارسى تەرگەلىپ جاتقان ءتورتىنشى قىلمىستىق ءىس. بۇل تۋرالى Associated Press مالىمدەدى.
جالعان ارەكەت جاساۋ، شەنەۋنىكتى انتىن بۇزۋعا كوندىرۋگە ارەكەت جاساۋ جانە بىرنەشە زاڭدى بۇزۋ اياسىندا ترامپ 11 باپ بويىنشا ايىپتالىپ وتىر.
ترامپتان باسقا تاعى 18 ادامعا ايىپ تاعىلعان. ونىڭ ىشىندە اق ءۇي اپپاراتىنىڭ بۇرىنعى باسشىسى جانە ترامپتىڭ سەرىكتەسى رەتىندە تانىلعان مارك مەدوۋس، ترامپتىڭ جەكە ادۆوكاتى رۋدولف دجۋلياني، ادىلەت دەپارتامەنتىنىڭ قىزمەتكەرى دجەففري كلارك جانە ترامپتىڭ ادۆوكاتى ءارى كەڭەسشىسى دجون يستمان.
ترامپقا تاعى ءۇش ءىس بويىنشا ايىپ تاعىلعان.
جاڭا ايىپتاۋلارعا 2021 جىلدىڭ قاڭتارىنداعى تەلەفون قوڭىراۋى سەبەپ بولعان. دونالد ترامپ دجوردجيا رەسپۋبليكاسىنىڭ مەملەكەتتىك حاتشىسى برەد رۋففەنسپەرگەرگە «11 780 داۋىس تابۋعا» كومەكتەسۋدى ۇسىنعان-دى.
الايدا اقش-تىڭ قازىرگى باسشىسى دجو بايدەن دجوردجيادا سايلاۋشىلار القاسىنىڭ 306 داۋىسىن جيناپ، جەڭىسكە جەتكەن. ال ترامپ 232 داۋىس جينادى.
الايدا ەكس-پرەزيدەنت وزىنە تاعىلعان ايىپتى مويىنداماي وتىر.
ۇقساس جاڭالىقتار
