اقش پرەزيدەنتى دونالد ترامپ كولۋمبيا پرەزيدەنتى گۋستاۆو پەترونى كوكاين وندىرۋمەن اينالىسادى دەپ ايىپتاپ، وعان قارسى وپەراتسيا جۇرگىزۋ مۇمكىندىگىن جوققا شىعارمادى، دەپ حابارلايدى «ادىرنا» ءتىلشىسى ريا نوۆوستيگە سىلتەمە جاساپ.
«كولۋمبيا دا وتە اۋىر جاعدايدا وتىر. ونى كوكاين ءوندىرۋدى جانە ءونىمدى اقش-قا ساتۋدى ۇناتاتىن «اۋرۋ ادام» باسقارۋدا. ونىڭ كوكاين زاۋىتتارى مەن فابريكالارى بار. بۇل ۇزاققا سوزىلمايدى، اقش تاراپىنان وپەراتسيا بولادى»، – دەدى ترامپ جۋرناليستەرگە.
بۇعان جاۋاپ رەتىندە كولۋمبيا پرەزيدەنتى گۋستاۆو پەترو ترامپتى وزىنە قاتىستى جالا جاباتىن ايىپتاۋلاردى توقتاتۋعا شاقىردى. ونىڭ ايتۋىنشا، كولۋمبيا ادىلەت ورگاندارىنىڭ ونداعان جىل بويى ەسىرتكى كارتەلدەرىنە قارسى جۇرگىزگەن كۇرەسى بارىسىندا ونىڭ ەسىمى بىردە-ءبىر سوت ماتەريالىندا اتالماعان.
«ترامپتىڭ بىلىمسىزدىكتەن تۋىنداعان مالىمدەمەلەرىن ءۇزىلدى-كەسىلدى جوققا شىعارامىن. سوڭعى 50 جىل ىشىندە مەنىڭ اتىم ەسىرتكى ساۋداسىنا قاتىستى بىردە-ءبىر سوت ىسىندە بولعان ەمەس، ماعان جالا جاپپاڭىز، ترامپ مىرزا»، – دەپ جازدى پەترو ح الەۋمەتتىك جەلىسىندە.
پەترو كولۋمبيانىڭ سوت جۇيەسى اتقارۋشى بيلىكتەن تاۋەلسىز ەكەنىن جانە كوپ جاعدايدا ونىڭ ساياسي قارسىلاستارىنىڭ باقىلاۋىندا ەكەنىن اتاپ ءوتتى. ايتۋىنشا، وڭىردەگى ەڭ ءىرى ەسىرتكى ساۋداگەرلەرىنىڭ قىزمەتىنە قاتىستى بارلىق ماتەريال كولۋمبيا سوتتارىنىڭ اشىق مۇراعاتتارىندا ساقتاۋلى.
ء«سىز كولۋمبيا تاريحىن وقىمايسىز، سوندىقتان سىن-پىكىرلەرىڭىز ساتسىزدىككە ۇشىراپ وتىر. كولۋمبياداعى ەسىرتكى قىلمىستارىن تەرگەۋمەن اينالىساتىن ءوز وفيتسەرلەرىڭىزبەن، ساراپشىلارمەن كەزدەسكەنىڭىز ءجون بولار ەدى. مەن ولارعا سولشىل سەناتور بولعان كەزىمدە ءوز تەرگەۋلەرىم ارقىلى كومەكتەسكەنمىن. دەموكراتيا مەن بوستاندىق ءۇشىن شىنايى كۇرەسكەرلەر عانا بار جەردە ەسىرتكى ساۋداگەرلەرىن ىزدەمەڭىز»، – دەپ تۇيىندەدى كولۋمبيا باسشىسى.
