ورمان قورىنىڭ ۋچاسكەسى مەملەكەت مەنشىگىنە قايتارىلدى، دەپ حابارلايدى “ادىرنا”.
قۇنى 1,6 ملرد تەڭگە بولاتىن ورمان قورىنىڭ ۋچاسكەسى مەملەكەتكە قايتارىلعانى تۋرالى اقمولا وبلىسى پروكۋراتۋراسىنىڭ ءباسپاسوز قىزمەتى جاريالادى.
«اقكول اۋدانىنىڭ پروكۋراتۋراسى ورمان قورىنىڭ جالپى اۋدانى 264 گەكتاردى قۇرايتىن رەكرەاتسيالىق، تۋريستىك جانە سپورتتىق ماقساتتا ۇزاق مەرزىمدى ورمان ورنالاستىرۋعا بەرىلگەن ۋچاسكەسىن قايتاردى. اقمولا وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ شەشىمىمەن ۇزاق مەرزىمدى ورمان ورنالاستىرۋ شارتى بۇزىلىپ، جالپى قۇنى 1,6 ملرد تەڭگەنى قۇرايتىن ۋچاسكە مەملەكەت مەنشىگىنە قايتارىلدى»، - دەلىنگەن.
الاڭ 2018 جىلدان بەرى نىسانالى ماقساتى بويىنشا پايدالانىلماعان بولىپ شىقتى. سونىمەن قاتار، جالعا الۋ تولەمى جۇرگىزىلمەگەنى دە انىقتالدى.
«ورمان ورتتەرىنىڭ شىعۋ قاۋپى جوعارى بولعانىمەن، ولاردىڭ الدىن الۋ شارالارى قابىلدانبادى، ورتكە قارسى جوسپارلار ازىرلەنبەگەن»، - دەپ اتاپ ءوتتى پروكۋراتۋرا.
باسقارمادا تۇسىندىرىلگەندەي، جوعارىدا كورسەتىلگەن ءمان-جايلار ۋاكىلەتتى ورگاننىڭ اۋدان پروكۋراتۋراسىنىڭ اكتىسى بويىنشا سوتقا شاعىمدانۋىنا نەگىز بولعان.
ۇقساس جاڭالىقتار
