اقمولا وبلىسىنداعى ستارىي كولۋتون اۋىلىندا وزەننىڭ تاسۋىنا بايلانىستى ءبىر ادام جوعالىپ كەتتى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
الەۋمەتتىك جەلىلەردە تاراعان اقپاراتقا سايكەس، ەلدى مەكەندە وتكەل مەن جول ماسەلەسى ۋشىعىپ تۇر. تۇرعىنداردىڭ ايتۋىنشا، اۋىلعا كىرىپ-شىعۋ مۇمكىن بولماي، ادامدار جۇمىسقا بارا الماي قالعان. سونىمەن قاتار ازىق-تۇلىك پەن ءدارى-دارمەك الۋ دا قيىنداعان.
وسى جاعداي اياسىندا اۋىل تۇرعىنىنىڭ جوعالعانى بەلگىلى بولدى. الدىن الا مالىمەت بويىنشا، ەر ادام تاڭەرتەڭ جۇمىسقا شىققاننان كەيىن قايتا بايلانىسقا شىقپاعان.
اقمولا وبلىستىق پوليتسيا دەپارتامەنتى اتالعان فاكتى بويىنشا سوتقا دەيىنگى تەرگەۋ باستالعانىن مالىمدەدى. ۆەدومستۆونىڭ حابارلاۋىنشا، ەر ادامنىڭ ۇيدەن شىققانى انىقتالعان، پوليتسياعا ونىڭ تۋىسى ارىزدانعان. قازىرگى ۋاقىتتا ىزدەستىرۋ شارالارى جۇرگىزىلۋدە.
وڭىرلىك توتەنشە جاعدايلار دەپارتامەنتىنىڭ مالىمەتىنشە، ىزدەۋ جۇمىستارىنا ەكى سۇڭگۋىر توبى جۇمىلدىرىلعان. ولار قايىقتارمەن وزەن اۋماعىندا جۇمىس جۇرگىزىپ جاتىر.
جاعداي باقىلاۋدا.
