كانديداتتار دەباتى. پوروشەنكو مەن زەلەنسكي نە ايتتى؟

دەباتتى باستاعان زەلەنسكي «2014 جىلعى سايلاۋدا پەتر پوروشەنكوعا داۋىس بەرگەنىن، بىراق ونىسى قاتە بولعانىن» ايتتى. ول «ءدارى-دارمەك جەتپەي، جول جوق بولسا، ول قانداي رەفورما» دەپ، قازىرگى ۋكراينا پرەزيدەنتىنىڭ جۇمىسىن سىنادى.

ال ەكىنشى بولىپ ءسوز العان پەتر پوروشەنكو «بۇل دەباتقا ازەر جەتتىك، ويتكەنى زەلەنسكي مىرزا بىزدەن، حالىقتان جاسىرىنىپ كەلدى» دەدى.

ول زەلەنسكيدىڭ ەل باسقارا الاتىنىنا كۇمانى بار ەكەنىن ءبىلدىردى. پوروشەنكو «بۇل كانديدات ءالسىز، ءپۋتيننىڭ سوققىلارىن كوتەرە المايدى» دەدى.

ۋكراينانىڭ قازىرگى پرەزيدەنتى پەتر پوروشەنكو «2014 جىلى ۋكراينانى پرەزيدەنت رەتىندە قابىلداپ العان كەزدە ەلدە التىن رەزەرۆى بوس بولعان، ەل قازىناسىندا اقشا جوق، اسكەر دە جوق ەدى» دەدى. ول زەلەنسكيدى «ەلدە سوعىس بولىپ جاتقاندا سەن رەسەيدىڭ اقشاسىنا كينو ءتۇسىرىپ، ۋكراينانى مازاققا اينالدىرىپ جۇرگەنسىڭ» دەپ ايىپتادى.

ال زەلەنسكي پوروشەنكودان «دنر مەن لنر ايماعىندا (ۋكراينانىڭ شىعىسىن باسىپ العان رەسەيلىك سەپاراتيستەردىڭ مويىندالماعان رەسپۋبليكاسى – رەد.) «روشەن» (پەتر پوروشەنكوعا تيەسىلى كونديتەرلىك كومپانيا – رەد.) كونفەتتەرى ساتىلىپ جاتقانى راس پا؟» دەپ سۇرادى. ۋكراينا پرەزيدەنتى مۇنى «جالعان» دەدى.

پوروشەنكو زەلەنسكيدەن «سەرىكتەسىڭىز (ميللياردەر يگور كولومويسكي – رەد.) «پريۆاتبانكتەگى» قارجىنى ۇرلاپ كەتكەنى ءۇشىن ونىڭ قولىن كەسەسىز بە؟» دەپ سۇرادى. زەلەنسكي بۇل ساۋالعا «ايىپتى بولسا جاۋاپ بەرەدى، ءبارى تۇرمەگە وتىرادى» دەدى.

دەبات كەزىندە زەلەنسكي پوروشەنكونىڭ «ۋكراينانى بەس جىلدان سوڭ قالاي ەلەستەتەسىز؟» دەگەن سۇراعىنا «ۋكراينا ەۋروپاعا بەت الدى، سول ءۇشىن قانىن توكتى. ەگەر حالىق مەنى گارانت دەپ قولداسا، وعان دايىنمىن. مەن پرەزيدەنتتىك قىزمەتتە تەك بەس جىلعا عانا وتىرام. قايتا سايلانبايمىن» دەپ جاۋاپ بەردى.

بۇدان سوڭ ءسوز العان پوروشەنكو «پياتىي كانالدى» (پوروشەنكوعا تيەسىلى تەلەارنا - رەد) ادىلدىكتى ايتاتىن، جۋرناليستەرگە قولايلى ورىن دەپ سيپاتتادى. ول «1+1 ارناسىن» (ميللياردەر كولومويسكيدىڭ جەكەمەنشىك تەلەارناسى - رەد) «جالعان اقپارات تاراتۋمەن اينالىسادى» دەپ ايتىپتادى.

دەباتتىڭ ءبىراز بولىگى پەتر پوروشەنكو مەن ۆلاديمير زەلەنسكيدىڭ ەمەس، پوروشەنكو مەن كولومويسكي اراسىندا وتكەندەي اسەر قالدىردى. پرەزيدەنت ءسوزىنىڭ كوپ بولىگىن ميللياردەردى ايىپتاۋعا ارنادى.

يگور كولومويسكي مەن شوۋمەن ۆلاديمير زەلەنسكيدىڭ قارىم-قاتىناسى تۋرالى اقپارات قۇرالدارى ءجيى جازادى.

پوروشەنكو «ءسىز شەشەنستان پرەزيدەنتى رامزان قادىروۆتى مازاقتاپ، ارتىنان كەشىرىم سۇراپ ەدىڭىز. ال ۋكراينا حالقىنان جەزوكشەگە تەڭەپ، ۇنەمى مازاقتايسىز، سول ءۇشىن قاشان كەشىرىم سۇرايسىز با؟» دەدى. زەلەنسكي «قادىروۆپەن ەشقاشان كەزدەسپەگەم» دەدى دە، «سوعىستا بالاسىن جوعالتقان انادان، اكەسىن جوعالتقان بالادان، بۇكىل ۋكراينا حالقىنان كەشىرىم سۇراۋعا قاشان دا ءازىرمىن» دەپ، تىزەرلەپ وتىردى.

زەلەنسكي «ءسىز 98 جىلدان بەرى شەنەۋنىكسىز. بىراق كەيىن وليگارح بولىپ كەتتىڭىز» دەپ، پوروشەنكونىڭ كاسىبىنە كۇمانمەن قارايتىنىن ايتتى.

زەلەنسكي «پەتر پوروشەنكونىڭ جەتىستىگى از ەمەس – ءتىل، اسكەر، ەۋروپا وداعىمەن ۆيزاسىز رەجيم. بىراق بۇل جەتىستىكتەردى ول وزىنە مەنشىكتەپ العىسى كەلەدى. مەنىڭ ويىمشا، ۋكراين ءتىلى سىزگە دەيىن مىقتى بولعان، ال ەۋروپامەن ۆيزاسىز رەجيم – سىزگە دەيىنگى ديپلوماتتاردىڭ دا ەڭبەگى. اسكەر – ۋكراينا حالقىنىڭ، ەرىكتىلەرىنىڭ ەرلىگى. بۇل جۇيەنى وزگەرتە الاتىنىمىزعا سەنەم. ال ءسىز ءبىزدىڭ بەس جىلىمىزدى ۇرلادىڭىز» دەدى.

پوروشەنكو «ءسىز تالانتتى اكتەرسىز، جاقسى پروديۋسەرلىك كومپانيا قۇردىڭىز، جاقسى تەلە ءونىم جاسادىڭىز. بىراق ءسىز – ەلدەن قاشىپ كەتكەن جالعىز وليگراحتىڭ (كولومويسكي ايتادى– رەد.) ادامىسىز. كولومويسكي، نەگە حالىقتان اقشاڭىزدى جاسىراسىز، نەگە تىعىلاسىز؟ زەلەنسكيدىڭ جاقتاستارى، سىزدەر 21 ءساۋىر كۇنى مەملەكەتتى پۋتين مەن كولومويسكيدىڭ تالاۋىنا بەرمەۋلەرىڭىزدى سۇرايمىن» دەدى.

دەبات ەرەجەسى بويىنشا ءار كانديدات 5 مينۋت كىرىسپە ءسوز سويلەدى جانە 36 مينۋت سۇراق-جاۋاپ كەزەڭىن وتكىزدى. ودان كەيىن قورىتىندى سوزگە 5 مينۋت بەرىلدى.

«وليمپيسكي» ستاديونىندا ەكى ساحنا قۇرىلعان جانە كانديداتتاردىڭ قولداۋشىلارى دا سول ەكى ساحنانىڭ ماڭىنا توپتاستى. دەبات باستالارعا بىرەر مينۋت قالعاندا پەتر پوروشەنكو ۆلاديمير زەلەنسكيدىڭ ساحناسىنا باردى. ەكى ۇمىتكەر ءبىر-بىرىنە جىلى شىراي تانىتىپ، قول الىستى.

• سايلاۋدىڭ ەكىنشى كەزەڭىنە وتكەن سوڭ زەلەنسكي پوروشەنكونى دەباتقا شاقىرعان. پوروشەنكو بىردەن كەلىسىم بەرگەن. دەبات 14 ساۋىرگە بەلگىلەنگەن. كيەۆتەگى «وليمپيسكي» ستاديونى دەبات وتەتىن جەر رەتىندە تاڭدالعان.
• 14 ساۋىردە پوروشەنكو دەباتقا كەلگەن. بىراق زەلەنسكي «دەباتتى ءوز ماقساتىنا پايدالانعىسى كەلەتىن كۇشتەر بار» دەپ ستاديونعا كەلمەدى. پوروشەنكو ستاديونعا كەلگەن جاقتاستارىنىڭ الدىندا ءسوز سويلەپ، جۋرناليستەرگە سۇحبات بەرگەن. كەيىن ەكى كانديداتتىڭ كومانداسى دەباتتى 19 ساۋىردە وتكىزۋگە ۋاعدالاسقان.
• 31 ناۋرىزدا ۋكرايناداعى سايلاۋدا زەلەنسكي 30 پايىز، پورشەنكو 15 پايىز داۋىس جيناپ، ەكىنشى تۋرعا وتكەن. كيەۆ حالىقارالىق ينستيتۋتىنىڭ ساۋالناماسىنىڭ ناتيجەسى بويىنشا، ەكىنشى كەزەڭدە سايلاۋشىلاردىڭ 72 پايىزى زەلەنسكيگە داۋىس بەرۋگە دايىن.
• سايلاۋدىڭ ەكىنشى كەزەڭى 21 ساۋىردە وتەدى.

"ازاتتىق" راديوسى