الماتى وبلىسى تالعار اۋدانى قاينار اۋىلدىق وكرۋگى اۋىز سۋعا زار بولىپ وتىر. “ەلامان اۋىلىن سۋمەن جابدىقتاۋ جۇيەسىنىڭ قۇرىلىسى" جوباسىن تەندەردەن ۇتىپ الىپ، جۇمىستى باستاپ، اياقسىز تاستاپ كەتكەن "دانەكەر" كومپانياسىن ەل دە، قۇزىرلى ورىندار دا ىزدەپ ءجۇر. بۇل تۋرالى جەلى بەلسەندىسى جانبوتا سۇلتانمۇراتقىزى Facebook پاراقشاسىنا جاريالادى، دەپ حابارلايدى “ادىرنا” ۇلتتىق پورتالى.
“ەل امان، جۇرت تىنىشتا اۋىز سۋ ازابىن تارتىپ، كەنەزەسى كەپكەن تالعار اۋدانى قاينار اۋىلدىق وكرۋگىنە قاراستى ەلامان اۋىلى تۇرعىندارىنىڭ مۇڭى ءبىر باسىنا جەتەرلىك. وركەنيەت عاسىرىندا عالامدىق جەتىستىكتەردى بىلاي قويىپ، كۇندەلىكتى قولداناتىن قانىپ ىشەر قارا سۋدىڭ ازابىن تارتقانى ازداي، قارا جولعا دا جارىماي وتىر. ينتەرنەتتتىڭ وزىنە ەندى عانا قولى جەتكەن اۋىل جۇرتى بالاباقشامىز، ەڭ بولماسا فەلدشەرلىك پۋنكتىمىز بولسا دەپ ارماندايدى. «ايتا، ايتا التايدى، جامال اپام قارتايدىنىڭ» كۇيىن كەشكەن جۇرتتىڭ مۇڭىن تىڭداپ قايتتىق. ويتكەنى ۇرپاعىنىڭ ەرتەڭىنە الاڭداۋلى حالىق باسى اۋىرىپ، بالتىرى سىزداسا دا جالقامىسقا جول تارتىپ، سونداعى امبۋلاتوريانى جاعالاۋعا ءماجبۇر. جانىڭ شىعىپ كەتپەسە بولعانى دەپ ازىلدەيتىن تۇرعىندار اۋىرا قالسا ءبىر-بىرىنە ەكپە سالىپ، تامىرىنا ينە قويىپ ماشىقتانىپ العانىن ەستىگەندە امالسىزدىڭ كۇنىنە تاڭ قالمادىق. بۇكىل اۋىل تۇرعىندارىن قارايتىن جالعىز فەلدشەر اسانوۆا ديدار اسانوۆانىڭ دا وتىراتىن تۇراقتى ورنى جوق. كۇن ۇزاققا كىم شاقىرادى، سوعان بارىپ، ءدارى-دارمەگىن ارقالاپ، اۋىل ءىشىن جاياۋ ارالايدى. ال اۋىل اكىمىنىڭ ورىنباسارى بەرگەن اقپار بويىنشا، اۋىلدا 1126 ادام رەسمي تىركەلگەن، 229 وتباسى بار. ەگەر تىركەلمەگەندەردى قووساڭىز، بۇل كورسەتكىش 2 ەسەگە ارتۋى مۇمكىن. وسىنشا حالقى بار اۋىلدىڭ وسىنداي مۇشكىل حالگە جەتۋىنە كىم كىنالى؟
اۋىلدى ارالاپ ءجۇرىپ تىلدەسكەن تۇرعىنداردىڭ اراسىندا " ءوز ۇيىمدە سۋ بار، باسقاسىندا شارۋام جوق» دەگەندەرگە قاراپ، «باسى اۋىرماعاننىڭ قۇدايمەنەن ءىسى جوق» دەگەن راس ەكەن-اۋ دەپ تاڭ قالدىق. ال سۋسىز وتىرعان اسىرەسە جاڭا قۇرىلىس جاعىنىڭ حالقى اۋىز سۋدى امالداپ، كەيبىرى ءۇيىنىڭ قاسىنان قۇدىق قازدىرىپ السا، كەيبىرى «ەلدە بار ەرىنگە تيەدى» دەگەندەي، سۋى بار كورشىسىنە كۇنى قاراپ وتىر. ءبىر ايتا كەتكەرلىگى، ەسكى سۋ قۇبىرىنان سۋ ءىشىپ وتىرعاندار دا، وزدەرى قازدىرىپ، سورعى ارقىلى سۋ الىپ وتىرعانداردىڭ دا ءىشىپ وتىرعان سۋلارى اۋىز سۋ تالاپتارىنا مۇلدە ساي كەلمەيدى. ەسكىدەن لاي سۋ ءىشىپ وتىرعان جۇرتىڭ قاراسى 100 شاقتى شاڭىراق بولسا، ءوز بەتىنشە امالداپ وتىرعانداردىڭ دەنى ىشۋگە جارامسىز تۇزدى سۋدى «جوقتان جوعارى» كورىپ وتىرعان جايى بار. ال "ەلامان اۋىلىن سۋمەن جابدىقتاۋ جۇيەسىنىڭ ۇۇرىلىسى" جوباسىن تىندەردەن ۇتىپ الىپ، جۇمىستى باستاپ، اياقسىز تاستاپ كەتكەن "دانەكەر" كومپانياسىن ەل دە، قۇزىرلى ورىندار دا "يتپەن ىزدەپ" تاپپاي ءجۇر”، دەپ جازدى جانبوتا.
سونداي-اق، اۋىل تۇرعىندارى ەلەكتر قۋاتى دا جەتكىلىكسىز ەكەنىن ايتىپ، شاعىمدانعان.
“تۇرمىستىق تەحنيكانىڭ جەتىستىكتەرىن دە پايدالانا المايتىنىن ايتقان تۇرعىندار ونىڭ سەبەبىن اۋىلداعى توك كوزى قۋاتىنىڭ ازدىعىمەن تۇسىندىرەدى. ءتىپتى سۋى بار ۇيلەردىڭ ءوزى كىر جۋاتىن ماشينامىزدى قوسا الماي، پۇشايمان بولامىز دەگەندى العا تارتادى. اۋىل ىشىندەگى اسفالتتالماعان جولداردىڭ اق شاڭى اسپانعا كوتىرىلىپ جاتقاندىقتان كۇندەلىكتى كىر جۋعاننان جالىققاندارىن ايتقان ايەلدەر قاۋىمى ەندى ساباق باستالسا جۋاتىن كىرلەرىنىڭ دە ەكى ەسە كوبەيەتىنىنە ناليدى. قاباقتارىنا كىربىڭ تۇسىرگەن جۋاتىن كىر ەمەس، ونى جۋاتىن سۋدىڭ جوقتىعى مەن قولىنداعى بار كىر ماشيناسىن قوساتىن توكتىڭ جەتكىلىكسىزدىگى. وعان اۋىلدىڭ اسپانىن الىپ كەتەتىن اق شاڭدى قوسىڭىز. قۇددى ءبىر وركەنيەتتەن ادا قالعان مۇحيت اراسىنداعى ارال دەرسىڭ”، - دەپ حالىقتىڭ مۇڭىمەن ءبولىستى.
