وسىدان ءۇش كۇن بۇرىن پاۆلوداردىڭ ورتالىق كوشەسى نازارباەۆ داڭعىلىنىڭ بويىنداعى تۋدىڭ جىرتىلىپ قالعانى تۋرالى الەۋمەتتىك جەلى ءبىر شۋلاپ باسىلعان. ەڭ العاش پاۆلودارلىق جۋرناليست ەسەنەبەك ساناتۇلى ءوزىنىڭ فەيسبۋك پاراقشاسىندا جاريالاعان بولاتىن.
"نەتكەن جامان ىرىم. پاۆلودارداعى جالعىز داڭعىل جاقىندا "تاۋەلسىزدىگىنەن" ايىرىلىپ ەدى، ەندى داڭعىل بويىنداعى مەملەكەتتىك بايراعىمىزدىڭ دال-دۇلى شىعىپتى. ءتيىستى ورگاندار نۇرسۇلتان نازارباەۆ داڭعىلىنداعى تۋدى قاشان اۋىستىرار ەكەن؟ اياق استىنان پرەزيدەنت كەلىپ قالىپ جۇرسە..." دەپ جازعان ساناتۇلىنىڭ جازباسىنان كەيىن جەرگىلىكتى بيلىك "تاۋەلسىزدىك" مونۋمەنتىندەگى بايراقتى جەدەل تۇردە اۋىستىرىپ، ورنىنا جاڭاسىن ىلگەن بولاتىن. كوپشىلىكتەن ءسۇيىنشى سۇراعان ساناتۇلىنىڭ پوستىن قاز-قالپىندا بەردىك.
"كوك تۋدىڭ جەلبىرەگەنى،
جانىما قۋات بەرەدى.
كەشەگى جىرتىق تۋدى الەۋمەتتىك جەلىگە سالعاننان كەيىن دەرەۋ الىپ تاستاپ، بۇگىن جاڭاسىن ءىلىپ قويىپتى. جەدەل ارەكەت جاساعان جەرگىلىكتى بيلىككە رەسپەكت! مەملەكەتتىك رامىزدەرىمىز ۇنەمى نازاردا بولسىنشى".
بۇل قۋانىش ۇزاققا سوزىلماپتى. بۇگىن ەسەنبەك ساناتۇلىنىڭ پاراقشاسىندا تاعى دا سول تۋعا قاتىستى كەلەڭسىز جازبانى كوزىمىز شالدى.
"پاۆلوداردا تۋ تاعى جىرتىلىپتى.
تاۋەلسىزدىك اتاۋىنان ايىرىلعان سوڭ تۋدىڭ دا بۇل كوشەدە تۇرعىسى جوق -اۋ. قايتا-قايتا جىرتىلا بەردى عوي. الدىڭعى كۇنى عانا جاڭاسىنا اۋىستىرىپ ەدى. ءۇش كۇنگە شىدامايتىن نە قىلعان ساپاسىز ماتەريال؟ الدە...بىرەۋلەر قاساقانا جىرتىپ ءجۇر مە؟ بالكىم، پاۆلودار وبلىسى پوليتسيا دەپارتامەنتى انىقتاپ كورەسىزدەر! ۇيات بولدى، ءوزى. كورمەيىن دەسەم تۋ كوز الدىمدا كۇندە كوزىم تۇسەدى. "جىرتىق تۋدى جاريا قىلدىڭ", دەپ الدەكىمدەر سىن دا ايتىپ جاتىر. ن. نازارباەۆ داڭعىلىنا تۋ شاق كەلمەسە مۇمكىن استانا كوشەسىنە اپارىپ ورناتاسىزدار، انۋار كۋمپەكەەۆ مىرزا!" دەپ جازىپتى جۋرناليست.
شىنىمەن دە ساپاسىز ماتەريالدان جاسالعان بايراقتى كىم ءىلىپ ءجۇر؟
"ادىرنا" ۇلتتىق پورتالى
