الماتىدا كوپقاباتتى ۇيدەن شىققان ءورت ءسوندىرىلدى، دەپ حابارلايدى "ادىرنا" ۇلتتىق پورتالى.
الماتىداعى تۇرعىن ۇيدەن شىققان ءورت اۋىزدىقتالدى. توتەنشە جاعدايلار مينيسترلىگىنىڭ ءباسپاسوز قىزمەتىنەن حابارلاعانداي, قىزىل جالىن ساعات 18:46 كەزىندە وقشاۋلانىپ، سوڭىرا سوندىرىلگەن.
ەسكە سالا وتىرايىق، بۇگىن الماتىداعى 16 قاباتتى ۇيدە ءورت تۇتاندى. ساعات 17:10-دا تجد كۇش-قۇرالدارى الاتاۋ اۋدانى، «اقكەنت» ىقشاماۋدانىندا ورنالاسقان 54-ءشى ۇيگە شۇعىل اتتانعان.
ءورت ءسوندىرۋ قىزمەتى وقيعاعا قاتىستى بىلاي پىكىر ءبىلدىردى:
«ءورت سوندىرۋشىلەر وقيعا ورنىنا 6 مينۋتتا جەتتى. ولار 16 قاباتتى تۇرعىن ءۇيدىڭ 5-قاباتىنداعى پاتەر اشىق جالىنمەن جانىپ جاتقانىن انىقتادى. قازىر ادامدار ەۆاكۋاتسيالانىپ جاتىر».
سوڭعى دەرەكتەرگە سايكەس، 300-گە جۋىق ادامنىڭ ەۆاكۋاتسيالانعانى ايتىلادى. ابىروي بولعاندا قازا تاپقاندار جوق.
بەلگىلى بولعانداي، ءورت كابەلدەن شىققان. ناقتىراق ايتساق، ءۇيدىڭ 1 جانە 16 قاباتىندا ەلەكتر كابەلدەرى جانعان.
الەۋمەتتىك جەلىدە ءورت سوندىرۋشىلەردىڭ قالتقىسىز قىزمەتىنە، قۇتقارۋ جۇمىستارىن شاپشاڭ ورىنداۋىنا ءتانتى بولعان جۇرتتىڭ ۆيدەوسى تارادى.
"ادىرنا" ۇلتتىق پورتالى