الماتى شىۇ-نىڭ تۋريستىك جانە مادەني استاناسى اتانباق. مۇنداي ۇسىنىستى بۇگىن ەل پرەزيدەنتى قاسىم-جومارت توقاەۆ جاسادى.
ۇيىمنىڭ كەزەكتى وتىرىسىندا مەملەكەت باسشىسى قازاقستانداعى ءتۋريزمدى تۇلەتۋ ماسەلەلەرىنە توقتالدى. ۇيىم اۋماعىندا «شانحاي ىنتىماقتاستىق ۇيىمىنىڭ كيەلى ورىندارى» جوباسىن قولعا الۋدى ۇسىندى. باستاما اياسىندا ۇلى ويشىل قوجا احمەت ياسساۋي كەسەنەسىنىڭ تانىستىرىلىمىن جاساۋ جوسپارلانعان. «تاريحي تاعىلىمدى شارالار حالىقتارتىڭ كوپجىلدىق بىرلىگىن بەكەمدەي تۇسەدى» دەدى پرەزيدەنت.
– ەل مەن حالىق اراسىن جاقىنداتۋدىڭ تاعى ءبىر ءتيىمدى تەتىگى – تۋريزم. دۇنيەجۇزى حالقىنىڭ 45 پايىزىن قامتيتىن شانحاي ىنتىماقتاستىق ۇيىمى كەڭىستىگى الەۋەتى ءالى تولىق پايدالانىلماعان الىپ تۋريستىك نارىق سانالادى. مۇنى مويىنداۋ كەرەك. قازاقستان بۇل باعىت بويىنشا كەشەندى شارالار قابىلداپ جاتىر. بىلتىردان باستاپ ەلىمىزدە ءۇندىستان، يران جانە قىتاي ازاماتتارى ءۇشىن ۆيزاسىز رەجيم ەنگىزىلدى. بۇل شارا مەملەكەتتەر اراسىنداعى ءتۋريزمدى دامىتۋعا ىقپال ەتەدى، – دەدى قر پرەزيدەنتى قاسىم-جومارت توقاەۆ.
سونداي-اق باسقوسۋدا پرەزيدەنت شىۇ-نىڭ جاڭا دامۋ ستراتەگياسىن قابىلداۋدى ۇسىندى. ماڭىزدى باستاما ۇيىمنىڭ الەۋەتىن كۇشەيتۋگە جاڭا سەرپىن بەرەتىنىن اتاپ ءوتتى. قازاقستان اتالعان تۇجىرىمدامانىڭ جوباسىن ازىرلەپ قويعانىن جەتكىزدى.
– شىۇ-نىق جاڭا دامۋ ستراتەگياسىن قابىلدايتىن ۋاقىت كەلدى دەپ ويلايمىن. قازاقستان اتالعان قۇجاتتىڭ جوباسىن ازىرلەدى جانە ونى الداعى توراعالىق ەتۋ كەزىندە تانىستىرۋدى جوسپارلاپ وتىر. جاڭا ستراتەگيادا ءوزارا ىنتىماقتاستىعىمىزدىڭ اناعۇرلىم پەرسپەكتيۆتى باعىتتارى بويىنشا شىۇ-نىڭ كۇن ءتارتىبىن كەڭەيتۋ كوزدەلگەن، – دەدى مەملەكەت باسشىسى.
