ساۋد ارابياسىنىڭ بيلىگى ۋكرايناداعى قاقتىعىستى بەيبىت جولمەن شەشۋ جولدارىن تابۋ ءۇشىن تامىز ايىنىڭ باسىندا بىرنەشە ەلدەرمەن كەلىسسوزدەر جۇرگىزگىسى كەلەتىنىن سەنبى كۇنى جاريالادى، دەپ “ادىرنا” پورتالى The Wall Street Journal باسىلىمىنا سىلتەپ حابارلايدى.
«تالقىلاۋعا قاتىسقان ديپلوماتتاردىڭ ايتۋىنشا، 5-6 تامىزدا جيددادا وتەتىن كەزدەسۋگە الەمنىڭ 30-عا جۋىق ەلىنەن جوعارى لاۋازىمدى تۇلعالار كەلەدى»، - دەپ جازادى باسىلىم.
بۇل كەزدەسۋگە باتىستىڭ، ۋكراينانىڭ ءارى ءۇندىستان مەن برازيليانىڭ وكىلدەرى قاتىسادى دەپ كۇتىلىپ وتىر.
قازىرگى ۋاقىتتا ۇلىبريتانيا، وڭتۇستىك افريكا، پولشا مەملەكەتتەرى كەزدەسۋگە قاتىساتىندارىن راستاعان.
سونداي-اق، اقش-تىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆاننىڭ جيددادا بولاتىنى ايتىلدى.
اتالمىش باسىلىمنىڭ مالىمەتىنشە، قىتايدى قاتىسۋعا ىنتالاندىرا الادى دەگەن ۇمىتپەن ءىشىنارا كەلىسسوزدەردى وتكىزۋگە ارنايى ساۋد ارابياسى تاڭدالعان.
ماۋسىم ايىنىڭ سوڭىندا ءدال وسىنداي كەزدەسۋ دانيانىڭ استاناسى كوپەنگاگەندە وتكەن بولاتىن. اتاپ ايتقاندا، برازيليا، ءۇندىستان، تۇركيا جانە وڭتۇستىك افريكا رەسپۋبليكاسى، سونداي-اق اقش، ۋكراينا جانە باتىس ەلدەرى قاتىستى.
