رەسەي پرەزيدەنتى ۆلاديمير پۋتين ۋكرايناداعى سوعىستى اياقتاۋ جونىندەگى ۇشجاقتى كەلىسسوزدەردى قايتا باستاۋعا دايىن ەكەنىن مالىمدەدى. الايدا ول مايدان شەبىندەگى اتىستى توقتاتۋ ۇسىنىسىن قولداماي، دونباستى رەسەي اۋماعى دەپ اتادى. بۇل تۋرالى پۋتين مەملەكەتتىك ۆگترك مەدياحولدينگىنىڭ ءجۋرناليسى پاۆەل زارۋبينگە بەرگەن سۇحباتىندا ايتتى، دەپ حابارلايدى “ادىرنا”.
22 قازاندا جاريالانعان سۇحباتىندا پۋتين اقش پرەزيدەنتىنىڭ ارنايى وكىلى ستيۆەن ۋيتكوففپەن كەزدەسۋدە ۆاشينگتوننىڭ دەلدالدىعىمەن كيەۆپەن ديالوگتى قايتا باستاۋعا كەلىسكەنىن جەتكىزدى.
رەسەي باسشىسىنىڭ ايتۋىنشا، كەلىسسوزدەردىڭ نەگىزگى ماقساتى – ۋاقىتشا بىتىمگە قول جەتكىزۋ ەمەس، تۇپكىلىكتى بەيبىت كەلىسىم جاسالعاننان كەيىن ۋكراينا مەن رەسەيدىڭ قاۋىپسىزدىگىن قامتاماسىز ەتۋ ماسەلەسىن تالقىلاۋ.
ء«بىز وسى ماقساتقا جەتۋ ءۇشىن بايلانىستاردى قايتا باستاۋعا دايىنبىز»، – دەدى پۋتين.
ۋكراينا پرەزيدەنتى ۆلاديمير زەلەنسكي بۇعان دەيىن سوعىستى اياقتاۋ جولدارىن تالقىلاۋ ءۇشىن پۋتينمەن جانە اقش پرەزيدەنتى دونالد ترامپپەن ۇشجاقتى كەزدەسۋگە دايىن ەكەنىن مالىمدەگەن بولاتىن.
الايدا كرەمل مۇنداي كەزدەسۋ فورماتىنا بىرنەشە رەت قارسىلىق ءبىلدىرىپ، كەي جاعدايدا زەلەنسكيگە ماسكەۋگە كەلۋ سياقتى تالاپتار قويعان. كيەۆ مۇنداي شارتتاردى كەلىسسوزدەرگە دەگەن شىنايى دايىندىقتىڭ بەلگىسى رەتىندە قابىلداماعان.
پۋتين مەن ۋيتكوففتىڭ كەزدەسۋىنەن كەيىن ماسكەۋ ۋكراينامەن كەلىسسوزدەردى قانداي دەڭگەيدەگى وكىلدەر ارقىلى جۇرگىزۋگە دايىن ەكەنىن ناقتىلاعان جوق.
سونىمەن قاتار رەسەي پرەزيدەنتىنىڭ كومەكشىسى يۋري ۋشاكوۆ اقش پرەزيدەنتى دونالد ترامپتىڭ وكىلدەرى رەسەيگە جەتكىزگەن ۇسىنىستار ماسكەۋدى «مۇلدە قاناعاتتاندىرمايتىنىن» مالىمدەدى. بۇل جاعداي كەلىسسوزدەرگە قاتىستى ۇستانىمدار اراسىندا ەلەۋلى الشاقتىق ساقتالىپ وتىرعانىن اڭعارتادى.
سۇحبات بارىسىندا پۋتين ۋكراينا پرەزيدەنتى ۆلاديمير زەلەنسكيدىڭ مايدانداعى قازىرگى بايلانىس سىزىعى بويىنشا سوعىس قيمىلدارىن توقتاتۋعا دايىن ەكەنى جونىندەگى مالىمدەمەسىنە دە تۇسىنىكتەمە بەردى.
رەسەي باسشىسى بۇل ۇسىنىستى قولداماي، دونباستى «تاريحي رەسەيدىڭ اۋماعى» دەپ اتادى.
بۇعان دەيىن، 2025 جىلى، اقش پرەزيدەنتى دونالد ترامپ تا مايدان شەبى بويىنشا اتىستى توقتاتۋ يدەياسىن قولداعانى تۋرالى اقپارات تاراعان ەدى. الايدا بۇل ءتاسىل رەسەيدىڭ دونباستىڭ بۇكىل اۋماعىن ۋكراينادان تالاپ ەتۋ جونىندەگى ۇستانىمىنا قايشى كەلەدى.
وسىلايشا، تاراپتاردىڭ سوعىستى توقتاتۋدىڭ شارتتارى جونىندەگى كوزقاراستارى ءالى دە سايكەس كەلمەيدى.
پۋتين سۇحباتتا رەسەيدىڭ ۋكراينامەن سوعىسقىسى كەلمەيتىنىن ايتىپ، اسكەري قاقتىعىستىڭ جالعاسۋىنا جاۋاپكەرشىلىكتى كيەۆكە جۇكتەدى.
«سوڭعى گەنەتيكالىق زەرتتەۋلەر ورىستار مەن ۋكراينداردىڭ ءبىر حالىق ەكەنىن كورسەتىپ وتىر»، – دەدى رەسەي پرەزيدەنتى.
الايدا ول گەنەتيكالىق زەرتتەۋلەردىڭ ناتيجەلەرى ۇلتتىق ەگەمەندىك ماسەلەسىنە قانداي قاتىسى بار ەكەنىن تۇسىندىرمەدى.
ءپۋتيننىڭ كەلىسسوزدەرگە دايىن ەكەنى تۋرالى مالىمدەمەسىنە قاراماستان، سۇحبات جاريالانعان كۇنى ۋكراينا اۋماعىنداعى رەسەيلىك شابۋىلدار توقتاعان جوق.
ۋكراينا تاراپىنىڭ مالىمەتىنشە، رەسەي كۇشتەرى حاركوۆ وبلىسىنداعى لوزوۆايا قالاسىنداعى كيىم-كەشەك بازارىنا، كيەۆتىڭ تاريحي ورتالىعىنا، سونداي-اق ەلدىڭ ءتۇرلى وڭىرلەرىندەگى اۆتوموبيل جولدارى مەن كوپىرلەرگە سوققى جاساعان.
لوزوۆايا قالاسىنداعى شابۋىل سالدارىنان ەكى ادام قازا تاۋىپ، 34 ادام جارالانعان.
