ۆاشينگتون كيەۆكە Javelin ("دجاۆەلين") اتتى تانكىگە قارسى زىمىراندار كەشەنىن جەتكىزگەنىن راستادى. بۇل جاڭالىق ءتورت جىل بويى ۋكراينا ۇلتتىق ارمياسىمەن سوعىسىپ جۇرگەن رەسەيلىك سەپارايستەردى قولداپ وتىرعان ماسكەۋدى الاڭداتىپ تاستايدى دەپ ويلايتىندار جەتەرلىك.
30 ساۋىردە اقش مەملەكەتتىك دەپارتامەنتىنىڭ رەسمي وكىلى ازات ەۋروپا/ازاتتىق راديوسىنىڭ ساۋالىنا: "قارۋ الدەقاشان جەتكىزىلدى" دەپ جاۋاپ بەردى.
ۆاشينگتوندا ۋكرايناعا اتالعان قارۋدى ساتۋعا قاتىستى ماسەلە كوپ تالقىلانعان. باسىندا اقش پرەزيدەنتى دونالد ترامپ زىمىران كەشەنىن بەرۋگە قۇلىقسىز بولعان. بىلتىرعى جەلتوقسان ايىندا عانا اق ءۇي كيەۆكە Javelin ساتۋدى ماقۇلداعان. ۋكراينا پرەزيدەنتى پەتر پوروشەنكو اقش-پەن جانە باتىس ەۋروپا ەلدەرىمەن اسكەري قارۋ-جاراق پەن قۇرال-جابدىق الۋ تۋرالى ۇنەمى كەلىسسوز جۇرگىزىپ كەلەدى.
اتى-جوندەرىن اتاماۋدى قالاعان ءبىرى اقش-تاعى، ەكىنشىسى ۋكرايناداعى ەكى دەرەك كوزى ازاتتىققا اق ءۇي رەسمي مالىمدەگەنگە دەيىن Javelin-ءنىڭ ۋكرايناعا جەتكىزىلگەنىن راستاعان ەدى. قارۋدىڭ قاشان جەتكىزىلگەنى، ۋكراينالىق اسكەريلەردىڭ ول قارۋدى قولدانۋدى قايتىپ ۇيرەنىپ جاتقانى جايىندا ازىرگە ناقتى دەرەك جوق. اقش مەملەكەتتىك دەپارتامەنتى باسقا اقپاراتپەن بولىسپەدى. ال ۋكراينا پرەزيدەنتىنىڭ اكىمشىلىگى قارۋدىڭ كەلۋىنە قاتىستى ەشقانداي مالىمەت بەرمەدى.
بىلتىر اقش مەملەكەتتىك دەپارتامەنتىنىڭ ءباسپاسوز-حاتشىسى حيزەر نويەرت اقش-تىڭ ۋكرايناعا "تاۋەلسىزدىگىن قورعاۋى، تەرريتوريالىق تۇتاستىعىن ساقتاۋى جانە ودان ارى اگرەسسياعا قارسى تۇرۋى ءۇشىن اسكەري كومەك قىلاتىنىن" حابارلاعان.
بۇل شەشىمگە قاتىستى رەسەيدىڭ سىرتقى ىستەر ءمينيسترىنىڭ ورىنباسارى سەرگەي ريابكوۆ اقش-تى "سوعىس ءورتىن تۇتاتىپ وتىر" دەپ ايىپتاعان.
كيەۆ پەن باتىس مەملەكەتتەرى ۋكراينانىڭ شىعىسىنداعى سەپاراتيستەردى رەسەي قارۋلاندىرىپ وتىر دەپ سانايدى. رەسەي ۋكراينانىڭ قۇرامىنداعى قىرىم اۆتونوميالىق رەسپۋبليكاسىن 2014 جىلدىڭ ناۋرىزىندا اننەكسيالاپ العان بولاتىن.
بىلتىر اقش كيەۆكە قۇنى 47 ميلليون دوللارلىق اسكەري كومەك بەرۋ تۋرالى شەشىم قابىلداپ، ول ناۋرىز ايىندا بەكىتىلگەن. بۇل جاردەمنىڭ ىشىنە Javelin اتتى تانككە قارسى 210 زىمىران كەشەنى كىرگەن.
2015 جىلدان بەرى اقش ۋكرايناعا جالپى سوماسى 750 ميلليون دوللار بولاتىن اسكەري قۇرال-جابدىق بەرگەن. ولاردىڭ قاتارىندا تۇندە كورۋگە ارنالعان قۇرىلعىلار جانە شاعىن راديۋستا جۇمىس ىستەيتىن راديولوكاتسيالىق جۇيە دە بار.
_______________________________________________________________________________________________________________________________
azattyq.org
