مونيتورينگ بارىسىندا انىقتالعان "كوپەس" ازامات 2021-2022 جىلدار ارالىعىندا 26 مىڭ توننا رەسەيلىك بيدايدى ورتالىق ازيا ەلدەرىنە (اۋعانستان، تاجىكستان، وزبەكستان) قازاقستاندىق ءونىم دەپ جازىلعان جالعان شوت-فاكتۋرالار بويىنشا ساتقان. ناقتىراق ايتقاندا، رەسەيلىك بيداي ءونىمىن 1 ملرد تەڭگەدەن استام سوماعا ەكسپورتتاعان. وسىلايشا، جالپى سوماسى 460 ملن تەڭگەنى قۇرايتىن حالىقارالىق ترانزيتتىك تاريف بويىنشا تاسىمالداۋ تولەمدەرىن تولەۋدەن جالتارىپ، "ەكى اساپ بيگە شىققان".
قازىرگى ۋاقىتتا سوتقا دەيىنگى تەرگەۋ اياقتالدى.
قر قپك 201-بابىنىڭ تالاپتارىنا سايكەس تەرگەۋ مالىمەتتەرى جاريا ەتىلۋگە جاتپايدى.
قازىرگى ۋاقىتتا دەپارتامەنت وكىلدەرى اۋىل شارۋاشىلىعى تاۋار وندىرۋشىلەردىڭ مۇددەسىن قورعاۋ ماقساتىندا بىرقاتار ءىس-شارالار قولعا الىنعانىن حابارلادى. بيداي وتكىزۋگە بايلانىستى جالعان شوت-فاكتۋرالاردى زاڭسىز بەرۋدىڭ جولىن كەسۋ بويىنشا جۇيەلى جۇمىستار جۇرگىزىلىپ جاتقانى ايتىلدى.
تەك سوڭعى ءبىر جارىم جىلدا پاۆلودار وبلىسىندا 5,4 ملرد تەڭگەدەن استام سوماعا جالعان شوت-فاكتۋرالاردى بەرگەنى ءۇشىن 5 تۇلعا قىلمىستىق جاۋاپكەرشىلىككە تارتىلدى، - دەپ مالىمدەدى قر قما ءباسپاسوز قىزمەتى.
"ادىرنا" ۇلتتىق پورتالى
