ۇلىبريتانيا رەسەيلىك «روساتوم» كورپوراتسياسىنىڭ ءۇش قۇرىلىمىنا جانە ەكى جەكە تۇلعاعا قاتىستى سانكتسيا ەنگىزگەنىن مالىمدەدى. بۇل تۋرالى ەلدىڭ سىرتقى ىستەر مينيسترلىگى مالىمدەدى، دەپ حابارلايدى «ادىرنا» ءتىلشىسى.
سانكتسيالىق تىزىمگە Rosatom Energy Projects, REIN Engineering, Rusatom Overseas كومپانيالارى، سونداي-اق «Rosatom Energy Projects»كومپانياسىنىڭ باس ديرەكتورى اندرەي روجدەستۆين مەن «Rusatom Overseas» پرەزيدەنتى يليا ۆەرگيزاەۆ ەنگىزىلگەن.
بۇل شەشىمگە كومپانيانىڭ شەتەلدە اەس سالۋ بويىنشا كەلىسىمشارتتار الۋعا تالپىنىس جاساپ، سول ارقىلى رەسەيگە قوسىمشا تابىس كوزدەرىن اشۋ جانە مۇناي كىرىسىنىڭ تومەندەۋىن وتەۋ ارەكەتتەرى نەگىز بولعان.
بۇعان دەيىن «روساتومنىڭ» بىرقاتار قۇرىلىمى باتىس سانكتسيالارىنا ىلىككەن ەدى. 2024 جىلدىڭ باسىندا اقش-تىڭ SDN تىزىمىنە «روساتومنىڭ» باس ديرەكتورى الەكسەي ليحاچەۆ پەن ونىڭ ورىنباسارلارى ەنگىزىلدى. سونداي-اق 2024 جىلدىڭ مامىرىندا اقش رەسەيدەن ۋران يمپورتىنا شەكتەۋ قويىپ، 2028 جىلدان باستاپ تولىق تىيىم سالاتىنىن جاريالادى. بۇعان جاۋاپ رەتىندە قاراشا ايىندا رەسەي ۇكىمەتى اقش-قا بايىتىلعان ۋران ەكسپورتىن ۋاقىتشا شەكتەۋ تۋرالى شەشىم قابىلدادى.
ايتا كەتەيىك، «روساتوم» – قازاقستانداعى «بالقاش» اەس قۇرىلىسى بويىنشا حالىقارالىق كونسورتسيۋمنىڭ جەتەكشىسى. اەس جوباسى بويىنشا العاشقى جۇمىس بىلتىر جازدا باستالعان. ال نەگىزگى ستانتسيانىڭ قۇرىلىسى 2029 جىلى باستالۋى مۇمكىن.
