كەشە «بايتاق» جاسىلدار پارتياسىنىڭ كەزەكتەن تىس سەزى وتكەنى حابارلاندى. جيىن بارىسىندا پارتيانىڭ اتاۋى «قازاقستان جاسىلدار» پارتياسىنا اينالىپ، ونىڭ ءتورايىمى رەتىندە بەلگىلى ەكولوگ ايجان سقاقوۆانىڭ سايلانعانى ايتىلدى. بۇگىن «بايتاق» پارتياسى جانە ءبىر «شىن» ءىىى سەز وتكىزىپ، پارتيانىڭ جاڭا ماقسات-مىندەتتەرىن پىسىقتادى.
بۇگىنگى جيىن كەشەگى جيىندى زاڭسىز دەپ سانايتىنىن ايتىپ، «قاراعايعا قارسى بىتكەن بۇتاق» – «قازاقستان جاسىلدار» پارتياسىنىڭ وكىلدەرىن «بۇلىكشىلەر» دەپ سانايتىندىعىن جەتكىزدى. «ادىرنا» ۇلتتىق پورتالىنىڭ ءجۋرناليسى بۇل ماسەلەنىڭ انىق-قانىعىنا ءۇڭىلىپ كوردى.
بيلىكشىلەر كىم، بۇلىكشىلەر كىم؟
بەلگىلى ەكولوگ ايجان سقاقوۆا
«بايتاق» پارتياسىنىڭ جانە ونىڭ باسشىلارىنىڭ اراسىندا بولىپ جاتقان ساياسي ايرىقشا بەلسەندىلىككە قاراپ پارتيا ىشىندە باس بيلىككە تالاس ءجۇرىپ جاتقانىن بايقاۋعا بولادى. 21 شىلدە كۇنى ەكولوگ بەلسەندى ايجان سقاقوۆا پارتيا ءتورايىمى رەتىندە سايلانىپ، ءتىپتى پارتيا اتاۋىن وزگەرتتى. پورتال جۋرناليسىنە ايجان سقاقوۆانىڭ حابارلاۋىنشا، سەزگە قاتىسۋ ءۇشىن وبلىستىق كونفەرەنتسيالارعا ۇسىنىلعان 80 دەلەگاتتان پارتيانىڭ بارلىق جيىرما رەسپۋبليكالىق فيليالىنان 61 دەلەگات قاتىسقان. ولار پارتياداعى ءاۆتوريتاريزمنىڭ الدىن الۋ ءۇشىن جارعىعا وزگەرىستەر ەنگىزگەن. ناتيجەسىندە، پارتيا بىرنەشە تەڭ توراعامەن باسقارۋدىڭ ۇجىمدىق تاسىلىنە كوشكەن.
جارعىنىڭ جاڭا نورمالارىنا سايكەس پارتيانىڭ 4 تەڭ توراعاسىنان تۇراتىن كەڭەس سايلانعانىن بايقاۋعا بولادى. ولار: بەيبىت اپسەنبەتوۆ، قاجىم جۇماليەۆ، ادىلبەك قوزىباقوۆ جانە ايجان سقاقوۆا.
«قازاقستان جاسىلدار» پارتياسىن قۇرۋشى بەلسەندىلەر توراعا ازاماتحان امىرتاەۆتى ايىپتاعان.
«سەزد بارىسىندا «بايتاق» پارتياسىنىڭ نەگىزىن قالاۋشىلار، رەسپۋبليكادا تانىمال ەكولوگتار مەن ەكو قوزعالىسىنىڭ كوشباسشىلارى ءبىر كەزدەرى ازاماتحان امىرتاەۆقا توراعا قىزمەتىن سەنىپ تاپسىرعان. ولار ازاماتحاننىڭ بيلىكتى باسىپ الۋعا، دەموكراتيالىق قۇندىلىقتاردى ەلەمەۋگە جانە سايلاۋشىلاردى قۇرمەت كورسەتپەۋگە باعىتتالعان ارەكەتتەرىن ايىپتادى» دەلىنگەن تەڭ توراعالار تۋرالى ايتىلعان حابارلامادا.
سونىمەن قاتار وندا «بايتاق» پارتياسىنىڭ ساياسي بيۋروسى بۇعان دەيىن امىرتاەۆتى پارتيا قاتارىنان شىعارىلعانى قۇلاققاعىس ەتىلگەن.
«پارتيادان ەشقانداي جىك شىققان جوق»
ازاماتحان امىرتاەۆ
ازاماتحان امىرتاەۆ بۇل دەرەكتەردى جوققا شىعارىپ، ناقتى «سەزدىڭ» بۇگىن وتكەنىن ايتادى.
- بۇگىن، 22 شىلدە، استانا قالاسى، «الاندا» قوناق ۇيىندە پارتيامىزدىڭ زاڭدى تۇردەگى رەسپۋبليكالىق سەزى ءوتتى. وعان ءار وڭىردەن دەلەگاتتار كەلدى. پارتيادان ەشقانداي جىك شىققان جوق. قارارلارعا وزگەرىستەر ەنگىزدىك. ەكىنشىدەن، جاڭا ساياسي كەڭەستىڭ قۇرامىن بەكىتتىك. بۇگىن ءبىز پارتيامىزدىڭ ءبىر، ورتاق، زاڭدى ەكەنىن كورسەتتىك. ال ەندى وزگە بىرەۋلەر جيىن جاساپ جاتسا، ولاردىڭ ارەكەتى زاڭعا قايشى ما، جوق پا، سول جاعىن قاراۋ كەرەك، - دەدى ازاماتحان امىرتاەۆ.
كەيىننەن «بايتاقتىڭ» ساياسي «ورنىقتىلىعىنا» قاتىستى پارتيا حاتشىسى ۆلاديمير مارتەل پىكىر ءبىلدىرىپ، كەشەگى جيىندى «سەز» دەپ اتاۋعا كەلمەيتىنىن، ولاردىڭ بارلىعى جۇيەسىزدىك پەن بۇلىككە بارىپ وتىرعانىن ايتتى.
- كەشە پارتياعا كوڭىلى تولمايتىن بۇلىكشىلەردىڭ زاڭسىز جيىنى بولدى. ولاردىڭ بارلىعى كەزىندە ازاماتحان امىرتاەۆقا داۋىس بەرگەندەر ەدى. جيىندارى – زاڭسىز، نە ءمور جوق، نە پارتيا بەلگىسى جوق. بۇگىن ءبىز زاڭدى ءىىى سەزىمىزدى وتكىزدىك، رەسپۋبليكانىڭ ءار وڭىرىنەن 3 دەلەگاتتان كەلدى. ساياسي كەڭەس قۇرامىن بەكىتتىك، قارارىمىزدى جاڭارتتىق. ال، كەشەگىلەردىڭ بارلىعى ساۋاتتى ادامدار، بىراق ارەكەتى تۇسىنىكسىز. مۇنداي بۇلىكتى ولار 6 مامىردان بەرى ۇيىمداستىرىپ كەلەدى، - دەدى پارتيا حاتشىسى.
«بايتاقتاعى» پارتيا بيلىگىنە تارتىس ءدۇيىم جۇرتتى ويلاندىرىپ قويدى. «بايتاق» پارتياسىنىڭ وكىلدەرى زاڭدى العا تارتىپ، قۇقىقتىق بىرىزدىلىككە جۇگىنەدى، ال «قازاقستان جاسىلدار» پارتياسىنىڭ بەلسەندىلەرى دەموكراتيا زاڭدىلىقتارىنىڭ ساقتالماعانىن ءسوز ەتىپ، سايلاۋشىلار قۇقىعىنىڭ بۇزىلعانىن ايتادى. كەلەسى ۇلكەن سەزدىڭ قانداي سيپات، قانداي سارىندا وتەرى ازىرگە بەلگىسىز.
ەسكە سالا كەتەيىك، «قازاقستاننىڭ «بايتاق» جاسىلدار پارتياسى» قوعامدىق بىرلەستىگى 2015 جىلى تىركەلدى. 2023 جىلى 20 قاڭتاردا بايتاق پارتياسى سول جىلعى پارلامەنت سايلاۋىنا قاتىساتىنىن مالىمدەدى. «بايتاق» پارتياسى ناۋرىزدا وتكەن سايلاۋدا شەكتىك داۋىس جيناي الماي، ماجىلىسكە وتە المادى.
داستان قاستاي
«ادىرنا» ۇلتتىق پورتالى
