الەۋمەتتىك جەلىدە «قازاقستان مۇسىلماندار ءدىني باسقارماسى بۇدان بىلاي بەيىت باسىنا ءزاۋلىم ساراي سالىپ، مارقۇم ءۇشىن ۇلكەن جەردى الۋعا تىيىم سالماق» دەگەن حابارلاما تارادى. «ادىرنا» ءتىلشىسى اقپاراتتىڭ راس-وتىرىگىن قمدب-نىڭ ءباسپاسوز ءبولىمىنىڭ مەڭگەرۋشىسى اعابەك قوناربايۇلىنان سۇرادى.
«ءمۇفتيات اتىنان قايشىلىقتى مالىمەت تارادى. قازاقستان مۇسىلماندارى ءدىني باسقارماسى بۇنداي ۇسىنىس تاستامادى. بۇل جەرگىلىكتى اكىمدىك جانىنداعى ءدىن ىستەرى باسقارماسى تاراپىنان ايتىلسا كەرەك»،—دەدى ول.
قمدب جانىنداعى «قامقور-شاراپات» سالتتىق قىزمەت كورسەتۋ ورتالىعىنىڭ ديرەكتورى مەيرامبەك قابىلبەكۇلى كوپشىلىكتىڭ سۇرانىسى نەگىزىندە باس ءمۇفتي ناۋرىزباي قاجى تاعانۇلى قابىر باسىندا ىسىراپ پەن باسەكەلەستىكتى توقتاتىپ، زيرات كوتەرۋدە جالپىعا ورتاق بىرىزدىلىك مادەنيەتىن قالىپتاستىرۋ جونىندە باستاما كوتەرگەنىن اتاپ ءوتتى.
«وعان سايكەس قازاقستان مۇسىلماندار ءدىني باسقارماسىنىڭ عۇلامالار كەڭەسى زيرات جانە زيرات مادەنيەتى تۋرالى كونتسەپتۋالدى قۇجات قابىلداعان. اتالعان قۇجاتقا ساي قابىرگە جەرلەنگەن كىسىنىڭ كىم ەكەندىگىن ايقىنداۋ ماقساتىندا جانە جۇرگىنشىلەر تاراپىنان تاپتالىپ، اياق استى بولماۋى ءۇشىن وعان شاعىن بەلگى قويۋعا رۇقسات ەتىلەدى. قۇلپىتاس بيىكتىگى 1 مەتر، ەنى 50 سانتيمەتردەن اسپاۋعا ءتيىس. قۇلپىتاسقا مارقۇمنىڭ اتى-ءجونى، تۋعان جىلى مەن قايتىس بولعان ۋاقىتى جازىلسا جەتكىلىكتى. مارقۇمنىڭ سۋرەتىن قويۋعا رۇقسات ەتىلمەيدى»،—دەدى باسشى.
ءدىنتانۋشى دوساي كەنجەتايدىڭ ايتۋىنشا، اكىمدىكتەگى باسقارمانىڭ ءىستىڭ ريتۋالدى بولىگىنە ارالاسۋى دۇرىس ەمەس.
«زايىرلىلىق ۇستانىمى تۇرعىسىنان الىپ قاراساق تا بۇل دۇرىس ەمەس. ۇسىنىستى باس ءمۇفتي بەرگەنى ءجون. جەر ماسەلەسى بولسا دا ءپاتۋانى باس ءمۇفتي ايتادى. ال بيلىك ارالاسپاۋى ءتيىس، ياعني سىرتتا تۇرعانى ابزال»،—دەپ پىكىر ءبىلدىردى مامان.
بۇعان دەيىن ەلوردا بيلىگى ۇلتتىق پانتەونداعى جەرلەۋ ورىندارىنىڭ تاپشىلىعىن مالىمدەگەن ەدى. باسقارمانىڭ ايتۋىنشا، ەلدىڭ كورنەكتى تۇلعالارىنا ارنالعان زيراتتىڭ ءوزى باستاپقىدا 25 ورىنعا ارنالعان. قازىرگى تاڭدا ونىڭ تورتەۋى عانا بوس قالعان.
