بۇگىن شىمكەنتتە قالا كۇنى مەرەكەسىنە وراي العاشقى سكەيت-پارك اشىلدى. ۆەلوسيپەدتى موتوكروسس جانە سكەيتبوردينگپەن اينالىسۋعا ارنالعان الاڭ قالاداعى اباي ساياباعىنىڭ اۋماعىندا ورنالاسقان.
شىمكەنت قالاسىنىڭ اكىمى مۇرات ايتەنوۆ مەرەكەگە وراي جاڭا نىسانمەن تانىسىپ، جاس سپورتشىلارمەن اڭگىمەلەستى. شاھار باسشىسىنىڭ ايتۋىنشا، مەملەكەت جاستاردىڭ بوس ۋاقىتىن ءتيىمدى ۇيىمداستىرۋعا، جاس بۋىننىڭ بۇقارالىق سپورتپەن جانە شىعارماشىلىقپەن اينالىسىپ، سالاۋاتتى ءومىر سالتىن ۇستانۋىنا بارىنشا قولايلى جاعداي جاساپ كەلەدى.
ايتا كەتەيىك، سكەيتبوردينگ تاياۋدا وليمپيادا ويىندارىنىڭ باعدارلاماسىنا ەنگىزىلگەن. شىمكەنتتە بۇل سپورت ءتۇرى ەندى عانا دامىپ كەلەدى. قالالىق سكەيتبوردينگ فەدەراتسياسىنىڭ جەتەكشىسى سەرگەي بارانەنكونىڭ ايتۋىنشا، قازىر شىمكەنتتە 100-دەن استام سكەيتەرلەر بولسا، تاعى سونشا جاس ۆەلوسيپەدتى موتوكروسپەن اينالىسادى ەكەن.
جاڭادان اشىلعان سكەيت-پاركتىڭ اۋماعى 800 شارشى مەتردى قۇرايدى. وندا ءبىر مەزگىلدە 40-قا جۋىق ادام سپورتپەن اينالىسا الادى. بۇل جەردە سەيتبوردينگپەن ەندى اينالىسىپ جۇرگەن اۋەسقويلارعا ارنالعان قاراپايىم فيگۋرالار دا، كاسىبي سكەيتەرلەردىڭ كۇردەلى تريۋكتار جاساۋىنا ارنالعان فيگۋرالار دا ورناتىلعان.
