11 ساۋىردە سۋدان قورعانىس ءمينيسترى مەملەكەتتىك تەلەارنادان مالىمدەمە جاساپ، ەل پرەزيدەنتى ومار ءال-ءباشيردىڭ بيلىكتەن كەتكەنىن مالىمدەدى.
سۋدان قورعانىس ءمينيسترى احمەد اۆاد يبن اۋف تەلەارنا ارقىلى 1989 جىلى بيلىككە كەلگەن باشير رەجيمىنىڭ قۇلاعانىن جاريالاپ، ەلدى بيلىك ءترانزيتى ۋاقىتىندا، ياعني ەكى جىل كولەمىندە اسكەريلەر باسقاراتىنىن مالىمدەدى.
ءمينيستردىڭ ايتۋىنشا، باشير قاماۋعا الىنعان. اسكەريلەر ەلدە ءۇش اي توتەنشە جاعداي جاريالادى. ەلدەگى بارلىق اۋەجاي 24 ساعاتقا جابىلدى. احمەد اۆاد يبن اۋفتىڭ مالىمدەۋىنشە، باشير قول قويعان 2005 جىلعى كونستيتۋتسيا كۇشىن جويادى.
سۋدان استاناسى حارتۋمدا مىڭداعان ادامنىڭ قورعانىس مينيسترلىگى عيماراتى ماڭىندا جينالىپ تۇرعانىنا وسىمەن التىنشى كۇن بولدى. كۋاگەرلەر اسكەريلەردىڭ قالاداعى ەڭ ماڭىزدى نىسانداردى قورشاعانىن، ونىڭ اراسىندا پرەزيدەنت سارايى دا بار ەكەنىن ايتادى.
ەلدى 30 جىل باسقارعان پرەزيدەنت ومار ءال-باشير رەجيمىنە قارسى نارازىلىق شارالارى وتكەن جىلدىڭ جەلتوقسان ايىندا باستالعان. اۋەل باستا نارازى تۇرعىندار ازىق-تۇلىك باعاسىن ارزانداتۋدى تالاپ ەتكەن. كەيىنىرەك نارازىلىق اكتسياسى ساياسي سيپات الدى. وتكەن سەنبى، 6 ساۋىردە نارازى ازاماتتار پرەزيدەنت وتستاۆكاسىن تالاپ ەتىپ، اسكەريلەردى وزدەرىن قولداۋعا شاقىردى.
قورعانىس ءمينيسترى مالىمدەمە جاساردىڭ الدىندا سولتۇستىك شتاتىنىڭ ءوندىرىس جانە ەكونوميكالىق رەسۋرس ءمينيسترى دارفۋر مادجۋب حۋسەين Al-Hadath تەلەارناسىنا "پرەزيدەنت ءال-باشير وتستاۆكاعا كەتكەن سوڭ بيلىككە يە بولاتىن اسكەري كەڭەستى قۇرۋ بويىنشا جيىن ءوتىپ جاتقانىن" ايتقان.
Baj News اگەنتتىگىنە سىلتەمە جاساعان حالىقارالىق باق ەلدىڭ قورعانىس ءمينيسترى جەتەكشىلىك ەتەتىن سۋداننىڭ اسكەري كەڭەسى بيلىكتى قولىنا الۋعا دايىندالىپ جاتقانىن حابارلاعان.
ومار ءال-باشير 1989 جىلعى اسكەري توڭكەرىستەن كەيىن بيلىككە كەلگەن. حالىقارالىق سوت ونى سۋداننىڭ دارفۋر پروۆينتسياسىنداعى قانتوگىسكە قاتىسى بار دەپ ايىپتايدى. باشير ايىپتى جوققا شىعارادى.
2019 جىلى قاڭتار ايىندا The Times باسىلىمى حارتۋمداعى نارازىلىقتى باسۋعا رەسەيلىك جالدامالىلار قاتىسۋى مۇمكىن ەكەنىن جازعان. كەيىنىرەك رەسەيدىڭ سىرتقى ىستەر مينيسترلىگى سۋداندا رەسەيلىك جالدامالىلاردىڭ بار ەكەنىن راستاعان.
وپپوزيتسيا مەن قۇقىق قورعاۋشىلار ءتورت ايدان بەرىپ بولىپ جاتقان بيلىككە قارسى نارازىلىق كەزىندە 60 ادامنىڭ قازا تاپقانىن، مىڭداعان ادامنىڭ ۇستالعانىن حابارلادى.
"ازاتتىق" راديوسى
