«سامۇرىق-قازىنا» باسشىسى 100 كۇندە اتقارعان جۇمىسىنىڭ قورىتىندىسىنا ارنالعان بريفينگتە ءسوز سويلەدى

5338
Adyrna.kz Telegram

بۇگىن ءباسپاسوز بريفينگىندە «سامۇرىق-قازىنا» اق باسقارما توراعاسى نۇرلان جاقىپوۆ وسى لاۋازىمعا كىرىسكەن العاشقى 100 كۇندەگى جۇمىسىن قورىتىندىلاپ، قوردى دامىتۋ جونىندەگى الداعى جوسپارلارى تۋرالى باياندادى.

ول قوردىڭ جۇمىسىن قولعا العان كەزدەگى ونىڭ جاعدايىنا، پورتفەلدىك كومپانيالاردىڭ باسشىلىق قۇرامى مەن قىزمەتكەرلەرىنىڭ دەڭگەيىنە ريزا بولعانىن اتاپ ءوتتى.

نۇرلان جاقىپوۆ قور قازاقستاننىڭ ەكونوميكاسىنىڭ جاي-كۇيىنە وراسان زور اسەر ەتىپ، ونىڭ درايۆەرى جانە بيزنەس-تاسىلدەردەگى كوشباسشى بولىپ تابىلاتىنىن اتاپ ءوتتى. «سامۇرىق-قازىنا» قورىنىڭ قازاقستاننىڭ 2022 جىلعى تۇراقتى دامۋىنا قوسقان ۇلەسى 7,6 ترلن تەڭگەنى قۇرادى.

«ەگەر مەملەكەتكە تولەنەتىن تولەمدەرىمىزدى، اتاپ ايتقاندا: 2022 جىلعى سالىقتاردى، ديۆيدەندتەردى جانە وزگە دە تولەمدەردى قوسا الاتىن بولساق، وندا بۇل سوما 2 تريلليون تەڭگەنى قۇرادى. بۇنى قازاقستاننىڭ ەڭ ءىرى اگلومەراتسياسى – الماتى قالاسى مەن الماتى وبلىسىنىڭ 2023 جىلعى بيۋدجەتىمەن سالىستىرۋعا بولادى»، – دەدى نۇرلان جاقىپوۆ.

بريفينگتە كوتەرىلگەن نەگىزگى ماسەلەلەردىڭ ءبىرى – پورتفەلدىك كومپانيالار قىزمەتىنىڭ بىرقاتار تۇرلەرى بويىنشا تاريفتەردى كوتەرۋگە قاتىستى بولدى. قوردىڭ باسشىلىعى ۇكىمەتپەن جانە مەملەكەتتىك ورگاندارمەن بىرلەسىپ، الەۋمەتتىك تۇراقتىلىقتى قامتاماسىز ەتۋ ماقساتىندا، ءادىل تاريفتەردى ەنگىزۋ باعىتىندا جوسپارلى تۇردە جۇمىس جۇرگىزەدى، بىراق حالىقتىڭ مۇددەسى مىندەتتى تۇردە ەسكەرىلەتىن بولادى.

«قور 1,2 ترلن تەڭگە سوماعا جەڭىلدەتىلگەن تاريفتەر مەن باعالاردى ۇسىنا وتىرىپ، قازاقستان ەكونوميكاسىن سۋبسيديالايدى. – دەدى نۇرلان جاقىپوۆ. – بۇل ۇزاق ۋاقىت بويى جەتكىلىكسىز قارجىلاندىرۋعا جانە سايكەسىنشە ينفراقۇرىلىمنىڭ توزۋىنا اكەلەدى. پرەزيدەنت وتكەن جىلى «ينۆەستيتسيالار ورنىنا تاريف» باعدارلاماسىن ىسكە اسىرۋدى تاپسىردى. قازىرگى تاڭدا ءبىز ۇكىمەتپەن جانە پرەزيدەنت اكىمشىلىگىمەن تاريفتەردى جوسپارلى تۇردە ارتتىرۋ ءۇشىن جۇمىس ىستەپ جاتىرمىز. ءبىزدىڭ مىندەتىمىز – ماقساتتى ينفلياتسيالىق ءدالىز شەگىندە تاريفتەردىڭ ءوسۋىن 10-12% شەگىندە ساقتاۋ جانە الەۋمەتتىك تۇراقتىلىقتى قامتاماسىز ەتۋ بولىپ تابىلادى»، – دەپ اتاپ كورسەتتى قور باسشىسى.

قازىرگى ۋاقىتتا مىنا كومپانيالارعا قاتىستى تاريفتەردى وزگەرتۋ كەلىسىلدى:

  • «قازمۇنايگاز» ۇك» اق – جانار-جاعارمايدىڭ (ججم) كوتەرمە باعاسىن ءوسىرۋ;
  • «QazaqGaz» ۇك» اق – گازعا كوتەرمە جانە بولشەك باعانى كوتەرۋ;
  • «سامۇرىق-ەنەرگو» اق – ەلەكتر ەنەرگياسىن وندىرۋگە تاريف;
  • «قازاقستان تەمىر جولى» ۇك» اق – ماگيسترالدىق تەمىرجول جەلىسى قىزمەتتەرىنىڭ ءتاريفى.

قازىرگى تاڭدا مىنا قىزمەتتەردىڭ ساناتتارى: ماگيسترالدىق سۋ قۇبىرى ارقىلى سۋ بەرۋ، گاز تاسىمالداۋ، جىلۋ ەنەرگياسى، ترانزيت جانە ەكسپورت، لوكوموتيۆتىك تارتىم بويىنشا تاريفتەردى وزگەرتۋ ماسەلەسى پىسىقتالۋدا.

بريفينگ بارىسىندا «سامۇرىق-قازىنا» قورى كىرىسىنىڭ 2023 جىلدىڭ سوڭىنا بولجامى ۇسىنىلدى. وسى بولجامعا سايكەس، قور اكتيۆتەرى قۇنىنىڭ ايتارلىقتاي ءوسۋى كۇتىلۋدە، ول جىل باسىنداعى 72 ميلليارد دوللارمەن سالىستىرعاندا ءوسىپ، 78 ميلليارد دوللاردى قۇرايدى.

بريفينگ سوڭىندا نۇرلان جاقىپوۆ «سامۇرىق-قازىنا» قورىنىڭ جەكە دامۋ ماقساتىن بەلگىلەدى.

«مەن قوردىڭ اكتيۆتەرىن، ۇلتتىق بايلىعىمىزدى ساقتاپ قانا قويماي، ولاردىڭ اشىقتىعىن، تيىمدىلىگىن ارتتىرۋىم قاجەت دەپ سانايمىن. مەن قوردى اكتيۆتەرىنىڭ جالپى قۇنى 72 ميلليارد اقش دوللارى بولعان كەزدە باسقارۋدى قولعا الدىم. 2026 جىلدىڭ سوڭىنا دەيىن قور اكتيۆتەرىنىڭ قۇنى، ياعني قازاقستان حالقىنا تيەسىلى كاسىپورىندار مەن كومپانيالاردىڭ قۇنى 100 ميلليارد دوللاردى قۇراۋى ءۇشىن بار كۇشىمدى سالعىم كەلەدى. بۇل ماقساتقا جەتۋ وڭاي ەمەس، بىراق بىزدە وعان قاجەتتى بارلىق مۇمكىندىكتەر بار ەكەنىنە سەنىمدىمىن»، – دەدى ول.

قوردىڭ تازا پايداسى مۇناي باعاسىنىڭ تۇسۋىنە قاراماستان، 2022 جىلعى دەڭگەيدەن تومەن بولمايدى دەپ جوسپارلانىپ وتىر.

 

«سامۇرىق-قازىنا» قورىنىڭ قوعاممەن بايلانىس دەپارتامەنتى

پىكىرلەر