مەملەكەت باسشىسى قاسىم-جومارت توقاەۆ توتەنشە جاعدايلار ءمينيسترى سىرىم ءشارىپحانوۆتى قابىلدادى، دەپ حابارلايدى «ادىرنا» ءتىلشىسى.
سىرىم ءشارىپحانوۆ مينيسترلىكتىڭ اتقارىپ جاتقان جۇمىستارى مەن جوسپارى جونىندە باياندادى. سونداي-اق مينيسترلىكتە الداعى ۋاقىتتا جۇزەگە اسىرىلاتىن ترانسفورماتسيا جانە قوعامدا قاۋىپسىزدىك مادەنيەتىن قالىپتاستىرۋ جۇمىستارى تۋرالى مالىمدەدى. ايتۋىنشا، توتەنشە جاعدايلاردىڭ سانى مەن اۋقىمى ۇلعايعان جاعدايدا ازاماتتىق قورعاۋدىڭ مەملەكەتتىك جۇيەسىن توتەنشە جاعدايدىڭ سالدارىن جويۋدان بۇرىن ونىڭ الدىن الۋعا باعدارلاۋ كوزدەلىپ وتىر.
بۇدان بولەك باسقارما باسشىسى قۇتقارۋ بولىمشەلەرىنىڭ ماتەريالدىق-تەحنيكالىق بازاسىن جاراقتاندىرۋ جانە تسيفرلاندىرۋ ءىسىن نىعايتۋ، سونداي-اق قۇتقارۋشىلار مەن ءورت سوندىرۋشىلەردىڭ كادرلىق الەۋەتىن ارتتىرۋ، ولاردى الەۋمەتتىك قورعاۋ شارالارىن كۇشەيتۋ جونىندە اقپارات بەردى. سونىمەن قاتار حالىقتى الدىن الا قورعاۋعا قاجەتتى جاعداي جاساۋ ماقساتىندا قولدانىستاعى نورماتيۆتىك-قۇقىقتىق اكتىلەرگە وزگەرىستەر مەن تولىقتىرۋلار ەنگىزۋگە ايرىقشا ءمان بەرىلىپ وتىرعانىن ايتتى.
قاسىم-جومارت توقاەۆ مينيسترلىككە توتەنشە جاعدايلاردىڭ سانىن ازايتۋ، سونداي-اق ازاماتتاردىڭ قاۋىپسىزدىگىن قامتاماسىز ەتۋگە باعىتتالعان شارالار كەشەنىن جۇزەگە اسىرۋ جونىندە تاپسىرما بەردى.
