ناتو كەلىسىمدەردەن باس تارتىپ، رەسەي شەكاراسىندا تۇراقتى اسكەري بازالارىن قۇرۋى كەرەك، دەدى ليتۆا پرەزيدەنتى گيتاناس ناۋسەدا The Times گازەتىنە بەرگەن سۇحباتىندا. بۇل جايلى "ادىرنا" ۇلتتىق پورتالى حابارلايدى.
ليتۆا باسشىسى، سونىمەن قاتار، باتىس "ۆلاديمير ءپۋتيننىڭ يادرو قارۋىن العا تارتقان بوپسالاۋىنا بەرىلمەۋى كەرەك" دەپ مالىمدەدى. وداقتاستارىنا "وتە قاۋىپتى جانە شۇعىل ارەكەت" قاجەت بولعان جاعدايدا اسكەري شىعىنداردىڭ ارتاتىنىن ايتىپ، وعان دايىن بولۋعا شاقىردى.
سونىمەن قاتار ساياساتكەر نەلىكتەن ءپۋتيننىڭ يادرولىق قارۋعا "جالعان" يەك ارتاتىندىعىن ءتۇسىندىردى.
ونىڭ ايتۋىنشا، كوپتەگەن باتىس ەلدەرىندەگى وداقتاستار ءپۋتيننىڭ "قۇمار ويىنشى" ەكەنىن تۇسىنەدى. "ول بارلىق قاۋىپ-قاتەرلەردەن سەسكەنىپ، ءوزىنىڭ كۇشتى بولعاندىعىنان ەمەس، ءوزىن ءالسىز سەزىنگەندىگىنەن مۇنداي قادامعا بارادى. مەنىڭ ويىمشا، رەسەيدەگى سوڭعى كوتەرىلىس ونىڭ السىزدىگىن كۇللى الەمگە پاش ەتتى كورسەتتى. سوندىقتان ءبىز مىقتى بولۋىمىز كەرەك جانە ءبىزدىڭ مىقتىلىعىمىز - ەڭ مىعىم توسقاۋىل بولۋى مۇمكىن", — دەدى ساياساتكەر.
ەسكە سالا كەتەيىك، ناتو مەن ماسكەۋ اراسىنداعى قاتىناستار جانە ىنتىماقتاستىق تۋرالى اكتىگە 1997 جىلى قول قويىلعان. قۇجاتتا اليانستىڭ جاڭا مۇشەلەرىن شەكارا ماڭىنا ورنالاستىرماۋ، يادرولىق قارۋ مەن ماڭىزدى جاۋىنگەرلىك كۇشتەردى تۇراقتى تۇردە شەكارا تۇبىنە جاقىنداتپاۋ جاعى قاراستىرىلادى.
"ادىرنا" ۇلتتىق پورتالى
