الماتى قالاسى اكىمدىگى مەن قر ۇعا بىرلەسكەن جوبالار ازىرلەمەك. قالا اكىمى ەربولات دوساەۆ بۇل باستامانى كوتەرىپ، قالا عىلىمىنا سەرپىن بەرۋدى كوزدەگەن. جۋىردا قر ۇعا باسقارما باسشىسى كۇنسۇلۋ زاكاريا مەن وتاندىق عالىمدار الماتى قالاسىنىڭ اكىمى ەربولات دوساەۆتىڭ قابىلداۋىندا بولىپ، بالاماسىز عىلىمي جوبالاردى تانىستىردى.
«الماتى – ىسكەرلىك، ەكونوميكالىق، مادەني ءومىردىڭ ورتالىعى جانە قارقىندى دامىپ كەلە جاتقان قالا ەكەنىن ءبارىمىز بىلەمىز. ونىڭ ءبىر دالەلى كەشەگى جازىق دالا بۇگىندە ۇلكەن قالاعا اينالدى. وسى جەردە ءبىر ەسكەرەتىن ءجايت قالا ينفروقۇرىلىمىن دامىتۋ جولىندا تۇرعىندارعا قيىندىق بولىپ تيەتىن وزەكتى ماسەلەلەر اياققا ورالماس ءۇشىن، ءاربىر جاسالىنعان دۇنيە تىكەلەي عىلىممەن زەردەلەنىپ بارىپ جۇزەگە اسۋى قاجەت» دەگەن قر ۇعا پرەزيدەنتى كۇنسۇلۋ زاكاريا الداعى ۋاقىتتا عىلىم ەل ىشىندەگى وزەكتى ماسەلەلەردىڭ شەشىلۋىندە ەرەكشە ماڭىزعا يە بولاتىنىن جەتكىزدى.
«2023 جىلى 117 ملرد. كۆت/ساع ەلەكتر ەنەرگياسىن وندىرسە، ال تۇتىنۋ كولەمى 123 ملرد. كۆت/ساع قۇرايدى. سوندا ەلەكتر ەنەرگياسىنىڭ ءديفيتسيتى 6 ملرد. كۆت/ساع قۇراپ وتىر.
- 2020 جىلى ەلدەگى سۋ رەسۋرسى 94 كم3 قۇراعان، ونىڭ 40%-ى شەت ەلدەردەن كەلەدى. ەكولوگيا جانە تابيعي رەسۋرستار مينيسترلىگىنىڭ مالىمەتىنشە 2030 جىلى سۋ رەسۋرستارىنىڭ دەفيتسيتى 23,2 كم3 قۇراۋى مۇمكىن.
- قازاقستان 2021 جىلى اۋانىڭ لاستانۋى دەڭگەيى بويىنشا الەمدە 32-ورىندا. اۋانىڭ لاستانۋ دەڭگەيى 21,9 مگ/م3» دەپ ناقتى مىسالدار كەلتىرگەن قر ۇعا پرەزيدەنتى ونىڭ شەشىمىن دە قاتار ايتىپ ءوتتى.
«وسىنداي ماسەلەلەردى شەشۋدە ءبىزدىڭ عالىمداردىڭ كومەگى اۋاداي قاجەت:
- ەلەكتر توعىن ۇنەمدەيتىن قۇرىلعىلاردى نەمەسە جاڭا ەلەكتر توقتارىن الۋ كوزدەرى تەحنولوگيالارىن جاساۋ;
- سۋ رەسۋرستارىن ۇنەمدەيتىن تەحنولوگيالار ويلاپ تابۋ نەمەسە لاستانعان وندىرىستىك سۋلاردى تازالاپ، قايتا پايدالانۋعا جاراتۋ ادىستەرىن تابۋ;
- ەكولوگيانى، اۋا باسسەينىنىڭ لاستانۋىن تەجەيتىن زاتتار نەمەسە ادىستەر ويلاپ تابۋ;
وسىعان وراي ەربولات اسقاربەكۇلى، ءوزىڭىزدىڭ بىزگە ايتقان ۇسىنىسىڭىزدى ەسكەرە وتىرىپ بۇگىندە ۇلتتىق عىلىم اكادەمياسىنىڭ قىزمەتكەرلەرى قالا دەڭگەيىندەگى تۇيتكىلدى ماسەلەلەردى شەشەۋگە باعىتتالعان دايىن جوبالاردى سارالاپ، جيناستىردى» دەدى اكادەميا باسشىسى.
قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسىنىڭ عىلىم دەپارتامەنتى ەلۋگە تارتا جوبامەن جەكە-جەكە تانىسىپ، الماتى قالاسىنىڭ دامۋىنا تىكەلەي اسەر ەتەتىن جوبانى قالا اكىمىنە ۇسىندى. ەربولات اسقاربەكۇلى ءار جوبامەن ءجىتى تانىسىپ، ولاردىڭ ىشىنەن ەكونوميكالىق ءارى الەۋمەتتىك تۇرعىدا ءتيىمدى بىرنەشە جوبانى كەزەك كۇتتىرمەي قولداۋعا دايىن ەكەنىن ءبىلدىردى.
P.S: الماتى قالاسى اكىمدىگىنىڭ بۇل باستاماسى تالاي يگى ءىستىڭ باسى دەپ بىلەمىز. وتاندىق عالىمداردى قولداۋ ارقىلى قازاق عىلىمىنا سەرپىن بەرەتىنىمىزدى وزگە ءوڭىر باسشىلارى دا تەرەڭ تۇسەتىنىنە بەك سەنىمدىمىز.
