الماتى كوشەلەرىن جوندەۋگە بيۋدجەتتەن 20 ملرد تەڭگە كولەمىندە قارجى ءبولۋ كوزدەلگەن. بۇل تۋرالى قالا اكىمدىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقپارات بويىنشا، مەگاپوليستىڭ كوشە-جول جەلىسىن ورتاشا جوندەۋ جوسپارى 2022 جىلدىڭ 4 توقسانىندا اۋدان اكىمدىكتەرى جانە تۇرعىنداردىڭ وتىنىشتەرى بويىنشا قالىپتاسقان. قالا بيۋدجەتىندە بيىل ۇزىندىعى 200 شاقىرىم بولاتىن 230 كوشەنى جوندەۋگە 20 ملرد تەڭگە قاراستىرىلعان. بىلتىر ۇزىندىعى 189 شاقىرىم 210 كوشەگە 17,5 ملرد تەڭگە جۇمسالعان. بۇل ءۇشىن اۋداندارعا جالپى بيۋدجەتتەن 500 ملن تەڭگە ءبولىندى.
بۇل رەتتە ۇقساس جۇمىس تۇرلەرى مەن قۇرىلىس ماتەريالدارىنىڭ سمەتالىق قۇنى وتكەن جىلمەن سالىستىرعاندا ورتا ەسەپپەن 7-10%-عا ءوستى. مىسالى، ەل اۋماعىندا قولدانىستاعى سمەتالىق باعالار جيناعىنا سايكەس بىلتىر 1 توننا قيىرشىق تاس-ماستيكالىق اسفالتبەتوننىڭ قۇنى 18 مىڭ 781 تەڭگە، ال بيىل 21 مىڭ 2 تەڭگە بولدى (+11%), 2022 جىلى 1 توننا جول بيتۋمىنىڭ قۇنى 168 مىڭ 642 تەڭگە، 2023 جىلى 175 مىڭ 315 تەڭگەنى (+4%) قۇرادى. سونداي-اق اۋىر بەتوننىڭ قۇنى 2022 جىلى 20 مىڭ 227 تەڭگە، 2023 جىلى 21 مىڭ 863 تەڭگە (+8%) بولدى.
ودان بولەك، جول جۇمىسشىلارىنىڭ جالاقىسى ساناتىنا بايلانىستى ورتاشا ەسەپپەن بىلتىر ءبىر ادامعا 1 مىڭ 648 تەڭگە، بيىل ءبىر ادامعا 2 مىڭ 63 تەڭگە (+20%) بولدى. جالپى، اعىمداعى جوندەۋ جولداردىڭ جاقسى جانە قاناعاتتانارلىق جاعدايداعى ۇلەسىن 86%-دان 89%-عا دەيىن ۇلعايتۋعا مۇمكىندىك بەرەدى.
