"تاۋەلسىزدىك دەگەن ءتاتتى ۇعىم" دەپ تاتتىلەپ سويلەيمىز عوي. بىراق سول باقىت قالاي كەلدى بىزگە؟ نۇرسۇلتان نازارباەۆ الىپ بەردى مە؟ جوق الدە قاندى كۇرەس جۇرگىزىپ ءجۇرىپ ءوزىمىز الدىق پا؟ قۇداي-اۋ، سوناۋ 91-دە ۇيىمىزگە كەلىپ تۇرعان قۇتتى قوناقتى ەسىگىمىزدەن سىعالاتىپ قويعان كىم ەدى؟ بوساعادان اتتاۋعا باتىلى بارماي ءبىراز كىدىرىڭكىرەپ، اقىرى شىدامى بىتكەن تاۋەلسىزدىگىمىز ەسىگىمىزدى ايقارا اشىپ ءوزى كىرىپ كەلىپ ەدى عوي، ەستيار اعايىن، ەستەرىڭىزدە مە؟
ءبىز تاۋەلسىزدىكتى ىشتەي اڭسادىق، بىراق ونى ىزدەگەمىز جوق. ءبىز ونى ەمەس، ول ءبىزدى ءوزى ىزدەپ تاپتى...
قىتايداعى اعايىننىڭ ءبىر اڭگىمەسى ەسكە ءتۇستى. 91-دە "كسرو قۇلادى" دەگەن xاباردى ەستىگەن بويدا ارعى بەتتىڭ قازاقتارى كۇندە ءبىر رەستورانعا جيىلىپ، جابىلىپ راديو تىڭدايدى ەكەن. تاريxي وتانىمىز - قازاقستان جەكە ەل بولعانىن xابارلاسا - جۋامىز دەپ شولمەكتەرىن كوتەرە بارادى ەكەن تاعى. سويتسە، كسرو-نىڭ قۇرامىنان انا ەل شىقتى، مىنا ەل شىقتى دەپ xابارلانىپ جاتادى. ءبىزدىڭ جاقتان اقجولتاي xاباردى انە كۇتەدى، مىنە كۇتەدى. جاز ءوتىپ، كۇز كەلەدى. "مىنالارعا نە بولعان" دەپ الاڭداي باستايدى. ءسويتىپ جىل سوڭى جاقىنداعاندا بارىپ، زارىعىپ كۇتكەن xابارلارىن ەستىپ، سارى مايداي ساقتاعان شولمەكتەرىن ءىشىپ، "وي باۋىرىمداپ" كورىسىپ، ولگەنشە ءىشىپ ماس بولىپ، توق كوڭىلمەن ۇيلەرىنە قايتادى.
بىزدەگى بىرەۋلەردىڭ كەلىپ تۇرعان باقتان ۇركىپ، قورقىپ، كەيىنگە شەگەرىپ جۇرگەنىن الىستاعى اعايىن تۇگىل، ءوزىمىز دە بىلگەمىز جوق.
مىنەكەي، باسىمىزعا قۇت بولىپ قونعان تاۋەلسىزدىكپەن 30 جىل وتە شىعىپتى. كوڭىلگە مەدەت بولاتىنى: تەرريتوريامىز تۇتاس، مەملەكەتتىك ينستيتۋتتى قۇردىق، دە-يۋرە بولسا دا نازارباەۆ پرەزيدەنتتىكتەن كەتتى. ەندى قانداي ەل بولماعىمىز - وزىمىزگە بايلانىستى. وتىز جىل وتباسىلىق ءhام بيۋدجەتتىك بيزنەسمەندەردى تايراڭداتىپ قويدىق. اسىلدارىمىز اتىلسا، ارتىن ىزدەمەدىك. ازاماتتارىمىزدىڭ قۇقى جانشىلسا، بولىسپادىق. بىرەۋ باس كوتەرسە، ول "بيلىكتىڭ ادامى" دەپ سەنىسپەدىك. مەملەكەتتىك باق-تىڭ وتىرىگىنە سەنىپ، ۇيدە تىعىلىپ "داتتى" وقىدىق. تب
وتىز جىلدا "تويدىم" دەمەگەن جۇيەنىڭ تاعايىنداعان ادامىن سايلايمىز با؟ جوق الدە شيرەك عاسىر تامىر جايعان جەمقورلىقتى تامىرىمەن ءۇزىپ، قارا باقىر ساناپ قالعان xالىقتىڭ الەۋمەتتىك اxۋالىن كوتەرەتىن، ادام دەگەن اتىمىزدى وزىمىزگە شەكپەن جاۋىپ قايتارىپ بەرىپ، ازاماتتىق قۇقىمىزدى قادىر تۇتاتىن تۇلعانى تاڭدايمىز با؟! ول ادام كىم بولماق؟ قازاقتى كىم ۇشپاققا شىعارا الادى؟
بۇگىن ۋاقىتشا پرەزيدەنت مىندەتىن اتقارۋشى توقاەۆ مىرزا وتاندىق پارتيا باسشىلارىن شاقىرىپ الىپ، كەڭەس وتكىزدى. ول پارتيالاردىڭ "دەكوراتيۆتى" ەكەنى امبەگە ايان. ەندى سول دەكوراتيۆتى پارتيا سەركەلەرىنەن دەكوراتيۆتى ۇمىتكەرلەر ءتىزىمىن قۇرا ما؟
بيلىك پرەزيدەنتتىككە ۇمىتكەر رەتىندە توقاەۆتى ۇسىناتىنى xاق. ال بيلىكتەگى ءجىبى ءتۇزۋ جىگىتتەر ءوزىن-ءوزى ۇسىنۋعا دارمەنى جەتە مە؟ قوعامنىڭ ءوز تۇلعاسىن سايلاپ، العا شىعارۋعا پارمەنى جەتە مە؟ كەلەشەك تاعدىرىمىزدى كىمگە سەنىپ تاپسىرا الامىز؟ تاڭداۋ - ءسىز بەن ءبىزدىڭ قولىمىزدا!
