"Táýelsizdik degen tátti uǵym" dep táttilep sóıleımiz ǵoı. Biraq sol baqyt qalaı keldi bizge? Nursultan Nazarbaev alyp berdi me? Joq álde qandy kúres júrgizip júrip ózimiz aldyq pa? Qudaı-aý, sonaý 91-de úıimizge kelip turǵan qutty qonaqty esigimizden syǵalatyp qoıǵan kim edi? Bosaǵadan attaýǵa batyly barmaı biraz kidirińkirep, aqyry shydamy bitken Táýelsizdigimiz esigimizdi aıqara ashyp ózi kirip kelip edi ǵoı, estııar aǵaıyn, esterińizde me?
Biz Táýelsizdikti ishteı ańsadyq, biraq ony izdegemiz joq. Biz ony emes, ol bizdi ózi izdep tapty...
Qytaıdaǵy aǵaıynnyń bir áńgimesi eske tústi. 91-de "KSRO qulady" degen xabardy estigen boıda arǵy bettiń qazaqtary kúnde bir restoranǵa jıylyp, jabylyp radıo tyńdaıdy eken. Tarıxı Otanymyz - Qazaqstan jeke el bolǵanyn xabarlasa - jýamyz dep shólmekterin kótere barady eken taǵy. Sóıtse, KSRO-nyń quramynan ana el shyqty, myna el shyqty dep xabarlanyp jatady. Bizdiń jaqtan aqjoltaı xabardy áne kútedi, mine kútedi. Jaz ótip, kúz keledi. "Mynalarǵa ne bolǵan" dep alańdaı bastaıdy. Sóıtip jyl sońy jaqyndaǵanda baryp, zaryǵyp kútken xabarlaryn estip, sary maıdaı saqtaǵan shólmekterin iship, "oı baýyrymdap" kórisip, ólgenshe iship mas bolyp, toq kóńilmen úılerine qaıtady.
Bizdegi bireýlerdiń kelip turǵan baqtan úrkip, qorqyp, keıinge shegerip júrgenin alystaǵy aǵaıyn túgil, ózimiz de bilgemiz joq.
Minekeı, basymyzǵa qut bolyp qonǵan Táýelsizdikpen 30 jyl óte shyǵypty. Kóńilge medet bolatyny: terrıtorııamyz tutas, memlekettik ınstıtýtty qurdyq, de-ıýre bolsa da Nazarbaev Prezıdenttikten ketti. Endi qandaı el bolmaǵymyz - ózimizge baılanysty. Otyz jyl otbasylyq hám bıýdjettik bıznesmenderdi taırańdatyp qoıdyq. Asyldarymyz atylsa, artyn izdemedik. Azamattarymyzdyń quqy janshylsa, bolyspadyq. Bireý bas kóterse, ol "bıliktiń adamy" dep senispedik. Memlekettik BAQ-tyń ótirigine senip, úıde tyǵylyp "Datty" oqydyq. Tb
Otyz jylda "toıdym" demegen júıeniń taǵaıyndaǵan adamyn saılaımyz ba? Joq álde shırek ǵasyr tamyr jaıǵan jemqorlyqty tamyrymen úzip, qara baqyr sanap qalǵan xalyqtyń áleýmettik axýalyn kóteretin, Adam degen atymyzdy ózimizge shekpen jaýyp qaıtaryp berip, azamattyq quqymyzdy qadyr tutatyn Tulǵany tańdaımyz ba?! Ol Adam kim bolmaq? Qazaqty kim ushpaqqa shyǵara alady?
Búgin ýaqytsha Prezıdent mindetin atqarýshy Toqaev myrza otandyq partııa basshylaryn shaqyryp alyp, keńes ótkizdi. Ol partııalardyń "dekoratıvti" ekeni ámbege aıan. Endi sol dekoratıvti partııa serkelerinen dekoratıvti úmitkerler tizimin qura ma?
Bılik Prezıdenttikke úmitker retinde Toqaevty usynatyny xaq. Al bıliktegi jibi túzý jigitter ózin-ózi usynýǵa dármeni jete me? Qoǵamnyń óz tulǵasyn saılap, alǵa shyǵarýǵa pármeni jete me? Keleshek taǵdyrymyzdy kimge senip tapsyra alamyz? Tańdaý - siz ben bizdiń qolymyzda!
