داستان تۇردالى - الماتى قالاسى وقۋشىلار سارايىنىڭ ءبىلىم الۋشىسى.
الماتىدا تاريحتاعى تۇڭعىش رەسپۋبليكالىق بالالار شىعارماشىلىق «جاس قانات. بالالار – 2023» بايقاۋى 1 ماۋسىمدا رەسپۋبليكا سارايىندا ءوتتى. وسى بايقاۋدا «ۆوكال» نوميناتسياسى بويىنشا الماتى قالاسى وقۋشىلار سارايىنىڭ تاربيەلەنۋشىسى داستان تۇردالى «سامال تاۋ» قازاق حالىق انىمەن گران-پري يەگەرى اتاندى. ەندى ول شىلدەدە «مەدەۋ» مۇز ايدىنىندا وتەتىن «ازيا داۋىسى» حالىقارالىق فەستيۆالىندە قازاقستاننىڭ نامىسىن قورعايدى.
جۇلدەلى ورىندار تومەندەگىدەي ءبولىندى: 1-ورىندى تۇركىستان وبلىسىنان زەرە ءجۇنىسباي، 2-ورىندى ماڭعىستاۋلىق ءامينا اسگاتوۆا جانە 3-ورىندى اقتوبە وبلىسىنان بالىم نسانالى يەلەندى. جەڭىمپازدارعا التىن، كۇمىس جانە قولا قاناتتاردان بولەك، الداعى «ازيا داۋىسى» حالىقارالىق فەستيۆالىنە دايىندىق جۇمىستارى ءۇشىن الماتى قالاسىنىڭ اكىمى ەربولات دوساەۆتىڭ اقشالاي گرانتتارى تابىس ەتىلدى.
-گران-پري العان كەزدە مەن قاتتى قۋاندىم جانە تولقىپ كەتتىم. مۋزىكاعا العاشقى قادامىمدى 3 جاسىمدا باستاعان ەدىم، ۆوكالعا 5 جاسىمنان باستاپ باردىم. سودان بەرى كوپتەگەن رەسپۋبليكالىق جانە حالىقارالىق بايقاۋلارعا قاتىستىم. وسىنداي جەتىستىكتەرگە جەتۋىمە اتا-انام، وقۋشىلار سارايىنىڭ ۇستازدارى كومەكتەستى. بولاشاقتا العان بەتىمنەن قايتپاي، ءوز كۋميرىم ديماش اعا سياقتى ستاديونداردا، ۇلكەن ساحنالاردا ونەر كورسەتۋدى ارماندايمىن،- دەيدى داستان تۇردالى.
بايقاۋدى ۇيىمداستىرۋشىلاردىڭ ايتۋىنشا، «جاس قانات. بالالار – 2023» اڭىزعا اينالعان «جاس قانات» بايقاۋىنىڭ تاريحىنداعى جاڭا باعىت بولماق. ەلىمىزدىڭ بارلىق وبلىسىنان كەلگەن 22 ۇمىتكەردىڭ ونەرىن رەسپۋبليكالىق ەسترادا شەبەرى الىبەك دىنىشەۆ، «جاس قانات» بايقاۋىنىڭ ءبىرىنشى گران-پري يەگەرى مەدەۋ ارىنباەۆ، ءجانيا اۋباكىروۆا، بايعالي سەركەباەۆ جانە باسقا دا بەلگىلى مادەنيەت جانە ونەر قايراتكەرلەرى باعالادى.
