رەسەي تەرگەۋ كوميتەتىنىڭ توراعاسى بۇرىنعى ديپلومات مەيرام قاناپيانىڭ ورىستار جايلى مالىمدەمەسىنە قاتىستى تەكسەرۋدى ۇيىمداستىرۋدى تاپسىردى، دەپ حابارلايدى "ادىرنا" پورتالى.
«الەۋمەتتىك جەلىلەردە سانكت-پەتەربۋرگ تۇرعىندارىنان رەسەي فەدەراتسياسىنا، اتاپ ايتقاندا سانكت-پەتەربۋرگكە بارىپ، رەسەي فەدەراتسياسى مەن ونىڭ ازاماتتارى تۋرالى قوعامدا تەرىس پىكىر ايتقان قازاقستاننىڭ بۇرىنعى باس كونسۋلىن جاۋاپكەرشىلىككە تارتۋدى سۇراعان ۇندەۋ تاراپ جاتىر. رەسەي فەدەراتسياسىنىڭ سانكت-پەتەربۋرگ قالاسى بويىنشا تەرگەۋ كوميتەتى و.ۆ.بوبكوۆ ۇسىنىلعان اقپارات بويىنشا پروتسەسسۋالدىق تەكسەرۋ ۇيىمداستىرىپ، حاتتاما ۇسىنۋدى تاپسىردى»، - دەپ حابارلادى ۆەدومستۆونىڭ ءباسپاسوز قىزمەتى.
بۇعان دەيىن قازاقستاننىڭ بۇرىنعى باس كونسۋلى مەيرام قاناپيا الەۋمەتتىك جەلىدە:
"قازاقستانداعى ورىس ازاماتتارى، سىزدەر ەلىمىزدىڭ تولىققاندى ازاماتتارى ەمەسسىزدەر. "ورىستىق ەركىندىكتەرىڭىزگە" از ۋاقىت قالدى. سىزدەرگە ەندىگى جەردە ءوز ىستەرىڭىز بەن سوزدەرىڭىزگە جاۋاپ بەرۋگە تۋرا كەلەدى. وكىنىشكە قاراي، سىزدەردىڭ ۋاقىتتارىڭىز تىم از. ءوز تاعدىرلارىڭىزعا جاۋاپ بەرۋ ءۇشىن قازاق ءتىلىن ۇيرەنىپ تە ۇلگەرمەيسىزدەر. سانكت-پەتەربۋرگتە جاستىق شاقتى وتكىزگەن جەرلەردى ارالاپ، وركەنيەتكە ساپارلاپ قايتامىن. "كۇيىپ بىتكەن" رەجيمدى كورەمىن...." دەگەن بولاتىن.
مەيرام قاناپيا سىرتقى ىستەر مينيسترلىگىندە 1997-2009 جىلدار ارالىعىندا جۇمىس ىستەگەن. ءازىربايجاندا اتتاشە (ديپلوماتيالىق وكىل تەرمينى - "ادىرنا"), رەسەيدىڭ سانكت-پەتەربۋرگ قالاسىندا باس كونسۋل بولعان.
بۇقارالىق اقپارات قۇرالدارىنىڭ حابارلاۋىنشا، ول ەكى جىل بۇرىن ۇلتارالىق ارازدىق تۋدىرعانى ءۇشىن قر قك-ءنىڭ 174-بابى بويىنشا ءىستى بولعان.
