قازاقستاندا Telegram مەسسەندجەرىندەگى تانىمال «دايۆينچيك تانىسۋ» سەرۆيسىنىڭ قىزمەتى زاڭسىز دەپ تانىلدى، دەپ حابارلايدى "ادىرنا" ۇلتتىق پورتالى.
ەلدە وعان تىيىم سالىندى. ءتيىستى شەشىمدى الماتى قالاسىنىڭ الاتاۋ اۋداندىق سوتى اۋدان پروكۋراتۋراسىنىڭ تالاپ ارىزى نەگىزىندە قابىلدادى. سوت شەشىمىنە سايكەس، سەرۆيسكە شەكتەۋ قويۋعا نەگىزگى سەبەپتەردىڭ ءبىرى – پايدالانۋشىلاردىڭ جاسىن تەكسەرۋدىڭ ءتيىستى تەتىكتەرىنىڭ بولماۋى جانە كامەلەتكە تولماعانداردىڭ قاۋىپسىزدىگىنە تونەتىن قاۋىپ.
الاتاۋ اۋداندىق پروكۋراتۋراسىنىڭ ينتەرنەت كەڭىستىگىنە جۇرگىزگەن مونيتورينگى بارىسىندا اۋديتورياسى ميلليونداعان پايدالانۋشىنى قامتيتىن «دايۆينچيك تانىسۋ» سەرۆيسى انىقتالعان. تەكسەرۋ كەزىندە پلاتفورماعا جاس ەرەكشەلىگىنە قاتىستى شەكتەۋسىز كىرۋگە بولاتىنى جانە كامەلەتكە تولماعانداردىڭ ساۋالنامالارى دا ورنالاستىرىلعانى انىقتالعان.
پروكۋراتۋرا سوتقا بەرگەن ارىزىندا سەرۆيستىڭ باقىلاۋسىز جۇمىس ىستەۋى بالالاردىڭ قاۋىپسىزدىگىنە ناقتى قاتەر توندىرەتىنىن كورسەتكەن. سوت وتىرىسىندا پروكۋراتۋرا وكىلى پلاتفورما ارقىلى كامەلەتكە تولماعاندارعا قاتىستى قىلمىس جاسالعان جاعدايدىڭ تىركەلگەنىن دە مالىمدەدى. تەرگەۋ ماتەريالدارىنا سايكەس، 2007 جىلى تۋعان كامەلەتكە تولماعان قىز 2025 جىلدىڭ ساۋىرىندە «دايۆينچيك» ارقىلى كۇدىكتىمەن تانىسىپ، كەيىن ونىمەن جىنىستىق قاتىناسقا تۇسكەن.
پروكۋراتۋرا بۇل جاعدايدى پلاتفورمانىڭ كامەلەتكە تولماعانداردىڭ جىنىستىق قولسۇعىلماۋشىلىعىنا قارسى قىلمىستاردىڭ جاسالۋىنا قاۋىپ توندىرەتىنىن دالەلدەيتىن فاكتورلاردىڭ ءبىرى رەتىندە كەلتىردى. سوت شەشىمى ورىنداۋ ءۇشىن ۋاكىلەتتى مەملەكەتتىك ورگاندارعا جىبەرىلدى. ونى ىسكە اسىرۋ مىندەتى مادەنيەت جانە اقپارات مينيسترلىگىنە جانە تسيفرلىق دامۋ مينيسترلىگىنە جۇكتەلگەن.
