پرەمەر-مينيستر ءاليحان سمايىلوۆ جىلۋ ماۋسىمىنا دايىندىق ماسەلەسىن تالقىلاعان كەڭەس وتكىزدى. ورتالىق مەملەكەتتىك ورگاندار مەن وبلىس اكىمدىكتەرى باسشىلارىنىڭ قاتىسۋىمەن الداعى جىلۋ بەرۋ ماۋسىمىنا دايىندىق ماسەلەلەرى تالقىلاندى. ۇكىمەت باسشىسى بىرقاتار جىلۋ بەرۋ نىساندارىن جوندەۋ جۇمىستارى تۇرالاپ، ۋاقىتىنان كەشىگىپ جاتقانىن حابارلادى، دەپ جازادى "ادىرنا" ۇلتتىق پورتالى.
ۇكىمەت باسشىسى جىلۋ ماۋسىمىنا دايىندىق ماسەلەسىنە كەلگەندە سەرگەكتىك تانىتۋدى تاپسىردى. ويتكەنى قازىردىڭ وزىندە بىرقاتار پروبلەمالىق ماسەلەلەر توبە كورسەتكەن. ماسەلەن، ۇكىمەت باسشىسىنىڭ حابارلاۋىنشا، بىرقاتار وبەكت بويىنشا جوندەۋ جۇمىستارى مەرزىمىنەن كەشىگىپ ءجۇرىپ جاتىر.
«بۇل ماسەلەنى ءبىز جاقىندا وتكەن ۇكىمەت وتىرىسىندا تالقىلادىق. دەگەنمەن ءوزارا ۇيلەسىمدى، بىرلەسكەن ءىس-قيمىلدى بۇدان دا كۇشەيتۋ قاجەت. سوندىقتان وسى جۇمىستاردىڭ بارلىعىن تاعى دا مۇقيات قاراپ، تىكەلەي شەشىم قابىلدايمىز»، – دەدى ءاليحان سمايىلوۆ.
كەڭەستە پرەمەر-مينيستر جىلۋ ماۋسىمىنا دايىندىقتىڭ الەۋمەتتىك زور سالماعى بار ەكەنىن ايتىپ، قازىردەن ءىرى اپاتتاردىڭ الدىن الۋعا قامدانۋدى، الداعى جىلۋ ماۋسىمىنىڭ شاشاۋىن شىعارماي، تۇراقتى ءوتۋىن قامتاماسىزداندىرۋدى مىندەتتەدى.
«اتاپ ايتقاندا، جەو جانە جەلىلەر يەلەرىمەن تىكەلەي، تىعىز جۇمىس جاساۋ ماڭىزدى. مەملەكەت تاراپىنان ستانتسيالاردىڭ وتىنىمدەرىنە سايكەس تاريفتەر بەكىتىلدى. بۇل قارجىلاندىرۋدى تارتۋعا جانە جاڭعىرتۋ جۇمىستارىن باستاۋعا مۇمكىندىك بەرەدى»، — دەدى ءاليحان سمايىلوۆ.سونداي-اق ۇكىمەت باسشىسى ەنەرگەتيكا سالاسىن باقىلاۋدى كۇشەيتۋدىڭ جانە ءتيىستى وڭىرلىك شتابتار جۇمىسىنىڭ ماڭىزىن اتاپ ءوتتى.
سونىمەن قاتار، ۇكىمەت باسشىسى ءبىرىنشى ۆيتسە-پرەمەر رومان سكليارعا جانە ەنەرگەتيكا ءمينيسترى الماسادام ساتقاليەۆتىڭ ەكىباستۇز جەو-سى مەن ريددەر جانە كەنتاۋ جەو-لارىنا بارىپ، جاعدايدى ءوز كوزىمەن كورۋدى تاپسىردى.
"ادىرنا" ۇلتتىق پورتالى
