سانجار بوقاەۆتىڭ جەكە موبيلوگرافى ۇلان نۇسىپقوجا وزىنە تاعىلعان بارلىق ايىپ بويىنشا كىناسىن مويىنداپ، قىلمىسقا قاتىسى بار وزگە ادامداردىڭ ارەكەتتەرى جونىندە سوتتا ايعاق بەرۋگە دايىن. بۇل تۋرالى ونىڭ ادۆوكاتى ءمادي اۋەكەنوۆ مالىمدەدى.
ادۆوكاتتىڭ ايتۋىنشا، قورعاۋ تاراپىنىڭ ۇستانىمى وزگەرگەن. ۇلان نۇسىپقوجا وزىنە تاعىلعان بارلىق قىلمىستىق قۇقىق بۇزۋشىلىق بويىنشا كىناسىن مويىنداۋ تۋرالى شەشىم قابىلداعانىن ايتقان. اتاپ ايتقاندا، ول الدىن الا ءسوز بايلاسۋ ارقىلى ادامدار توبىنىڭ ۇرلىق جاساۋى (قر قك 188-بابى 2-بولىگىنىڭ 1-تارماعى), اعاشتاردى زاڭسىز كەسۋ (قر قك 340-بابى 3-بولىگىنىڭ 1-تارماعى) جانە كورىنەۋ جالعان اقپارات تاراتۋ (قر قك 274-بابى 2-بولىگىنىڭ 1 جانە 3-تارماقتارى) بويىنشا تاعىلعان ايىپتاردى مويىنداپ، جاسالعان ارەكەتتەردىڭ ءمان-جايىنا قاتىستى سوتتا ءوز ەركىمەن شىنايى ءارى دايەكتى ايعاق بەرۋگە نيەتتى.
ادۆوكات قورعاۋىنداعى ازاماتتىڭ ايعاقتارى تەك ءوزىنىڭ ءىس-ارەكەتتەرىنە عانا ەمەس، قىلمىسقا قاتىسى بار وزگە ادامداردىڭ ارەكەتتەرىنە دە قاتىستى بولاتىنىن اتاپ ءوتتى.
بۇعان دەيىن سوت ۇلان نۇسىپقوجانىڭ دەنساۋلىق جاعدايىن ەسكەرىپ، وعان قاتىستى بۇلتارتپاۋ شاراسىن كۇزەتپەن ۇستاۋدان ۇيقاماققا اۋىستىرعان بولاتىن.
ۇلان نۇسىپقوجا ادۆوكاتىنىڭ مالىمدەمەسىن قولداپ، كىناسىن مويىندايتىنىن جانە ءىستىڭ ءمان-جايى بويىنشا سوتقا شىنايى ايعاق بەرۋگە دايىن ەكەنىن جەتكىزدى. بۇعان دەيىن ول سانجار بوقاەۆ ءوزى ءۇشىن جالداعان ادۆوكات سەرگەي كيمنىڭ قىزمەتىنەن باس تارتقان ەدى.
