رەسمي دەرەكتەرگە سەنسەك بۇگىندە قازاقستاندا 700 مىڭعا تارتا مۇمكىندىگى شەكتەۋلى تۇرعىن بار. ولاردىڭ ىشىندە نارىق زاڭدىلىقتارىنا قابىلەتتى، قوعامنىڭ دامۋىنا ىقپال ەتە الاتىندارىنىڭ سانى مول. اتاپ ايتقاندا 58 پايىزى ەڭبەككە قابىلەتتى. دەمەك، مۇمكىندىگى شەكتەۋلى جاندار ءوز ەرەكشەلىكتەرىنە قاراماستان قازاقستان قوعامىنىڭ دامۋىنا ءبىر كىسىدەي ات سالىسا الادى. بۇل باعىتتا ەلىمىزدە بىرقاتار ءتيىمدى باعدارلامالار دا جوق ەمەس.
قوعامداعى مۇمكىندىگى شەكتەۋلى جانداردىڭ الەۋەتىن ارتتىرىپ، الەۋمەتتىك ستاتۋسىن ايقىنداۋ قاشان دا ماڭىزدى. ويتكەنى ولاردىڭ باسىم بولىگىنىڭ ەل دامۋىنا قوسار وزىندىك ۇلەسى بار. ماسەلەن، قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ولجاس ورداباەۆ ءوز سوزىندە مۇمكىندىگى شەكتەۋلى جاندار ءۇشىن ارنايى كۆوتا بەلگىلەۋ ماسەلەسىنە توقتالادى:
– ءبىرىنشىسى – مۇگەدەكتىگى بار ادامدار ءۇشىن جۇمىس ورىندارىن كۆوتالاۋ تەتىگى. بۇل تالاپ بويىنشا جۇمىس بەرۋشىلەر بار جۇمىس ورىندارى سانىنىڭ 2-دەن 4%-عا دەيىنگى مولشەردە جۇمىس ورىندارىندا مۇگەدەكتىگى بار ادامدار ءۇشىن كۆوتا بەلگىلەنەدى. وسى باعىت اياسىندا وتكەن جىلى مۇمكىندىگى شەكتەۋلى 12,2 مىڭ ادام جۇمىسقا ورنالاستىرىلدى.
قازاقستان قوعامىن دامىتۋ ءۇردىسى جولىندا جۇدىرىقتاي جۇمىلىپ، بارلىق قوعام مۇشەلەرىن ەڭبەككە ارالاستىرۋ ءۇشىن ەرەكشە قاجەتتىلىكتەرى بار جاندارعا ارنايى ەڭبەك ەتەتىن ورىنداردى قۇرۋدىڭ دا الەۋمەتتىك سالماعى بار. مەملەكەت مۇمكىندىگى شەكتەۋلى جاندار ءۇشىن جۇمىس ورنىن ۇيلەستىرىپ، جابدىقتاعان كاسىپكەرلەردىڭ شىعىندارىن وتەپ بەرۋدى دە قاراستىرىپ وتىر. ناقتىراق ايتساق، مەملەكەت قىزمەت ۇسىنۋشىنىڭ شوتىنا 1 ملن تەڭگەگە دەيىن اۋدارادى.
قر ەڭبەك جانە حالىقتى الەۋمەتتىك قورعاۋ ۆيتسە-ءمينيسترىنىڭ حابارلاۋىنشا، ارنايى جۇمىس ورىندارىنا جۇمىسقا ورنالاسقان مۇگەدەكتىگى بار ادامداردىڭ جالاقىسى 3 جىل ىشىندە سۋبسيديالانادى. ماسەلەن، ءبىرىنشى جىلى مەملەكەت جالاقىنىڭ 70%-ىن، ەكىنشى جىلى – 65%-ىن، ءۇشىنشى جىلى 60%-ىن سۋبسيديالايدى.
بۇدان بولەك، مۇمكىندىگى شەكتەۋلى جانداردى قولداۋدى ۇلتتىق جوبانى ىسكە اسىرۋدىڭ ماڭىزدى باعىتى رەتىندە قاراستىرۋعا دا نازار اۋدارىلعان. مەملەكەت گرانتتار تاعايىنداپ، ەرەكشەلىكتەرى بار جاندارعا باسىمدىق بەرۋدى كوزدەيدى. بيىلعى جىلعى حالىقتىڭ وسال توپتارىنا، سونىڭ ىشىندە ەرەكشە قاجەتتىلىكتەرى بار ادامدارعا جانە مۇگەدەكتىگى بار بالالارى بار اتا-انالارعا ارتىقشىلىق بەرىلەدى. ءوتىنىش enbek.kz سايتى ارقىلى قابىلدانادى.
قورىتا ايتساق، قازىردىڭ وزىندە مۇگەدەكتىگى بار بالا تاربيەلەپ وتىرعان 286 اتا-انالار باعدارلامانىڭ يگىلىگىن كورىپ ۇلگەرگەن. ال ەرەكشەلىگى بار 481 ادام مەملەكەت تاراپىنان ءوزىنىڭ اسىل ارمانى مەن جوسپارىن جۇزەگە اسىرۋ ءۇشىن گرانت العان.
داستان قاستاي
"ادىرنا" ۇلتتىق پورتالى
