ۇلتتىق ەكونوميكا ءمينيسترى الىبەك قۋانتىروۆ تۇرعىندارعا ەرەكشە ۇندەۋ جاساپ، قىس كەزىندە پاتەردەگى تومەن تەمپەراتۋراعا بوي ۇيرەتىپ، "شيراۋعا شاقىردى" شاقىردى، دەپ حابارلايدى "ادىرنا" ۇلتتىق پورتالى.
«20-21 گرادۋستى قۇرايتىن قالىپتى نورمالارعا ۇيرەنۋ كەرەك. قىستا بۇل تەمپەراتۋرانى قالىپتى دەپ سانايمىز، سەبەبى رەسۋرستاردى ۇنەمدەۋ قاجەت. ءبىزدىڭ ەلدە ادامدار ۇيدەگى جوعارى تەمپەراتۋراعا ابدەن ۇيرەنىپ العان. مۇنىڭ سالدارى جىلۋ بەرۋ جەلىلەرىنە تىم جوعارى سالماق ءتۇسىرىپ وتىر»، - دەدى الىبەك قۋانتىروۆ پارلامەنت پالاتالارىنىڭ بىرلەسكەن وتىرىسىنان كەيىن تىلشىلەر سۇراعىنا جاۋاپ بەرە وتىرىپ.
ءمينيستردىڭ پايىمداۋىنشا، جىلۋ بويىنشا نورماتيۆ كورسەتكىشى - 21 گرادۋس شاماسىندا. تۇرعىندار قىستا 23-25 گرادۋسقا ۇيرەنىپ قالعان جانە ونى ءتيىستى نورماعا تۇسىرسە، حالىق شاعىمدانا باستايدى.
سونداي-اق مينيستر قىستا "ارقانى كەڭگە سالىپ", تەرەزەنى نەمەسە بالكوندى اشۋ ارقىلى ءۇي تەمپەراتۋراسىن قولدان رەتتەمەۋگە شاقىردى.
«بىزگە ارناۋلى قۇرىلعىلاردى ورناتۋ كەرەك، سول كەزدە تۇرعىندار پاتەردەگى جىلۋدى قاداعالاپ، ەنەرگيانى ۇنەمدەۋگە نازار اۋدارا باستايدى. جالپى، ەلىمىزدەگى ينفراقۇرىلىمدى جاڭارتۋ شىعىندارى تەك تاريف ەسەبىنەن عانا ەمەس، سونىمەن قاتار بيۋدجەت قاراجاتىن يگەرۋ ارقىلى ىسكە اسىرىلادى. تاريف دەڭگەيى ادامدارعا سالماق تۇسىرمەۋى كەرەك. حالىقتىڭ الەۋمەتتىك وسال توپتارىنا اكىمدىكتەر ارقىلى وتەماقى تولەۋ مۇمكىندىگى بار»، - دەدى مينيستر.
ورايى كەلگەندە ايتا كەتەيىك، ءا.قۋانتىروۆ بيىل جىلۋ تاريفتەرى قانشالىقتى قىمباتتايتىنىن ايتقان بولاتىن. بۇل رەتتە:
«ءتيىستى ەسەپ-قيساپتى جۇرگىزۋ ءۇشىن ورتاشا ەسەپپەن 60-70 شارشى مەترلىك ەكى بولمەلى پاتەردىڭ شىعىنىن نازارعا الامىز. وڭىرلەردە ورتاشا چەك ايىنا 2-4 مىڭ تەڭگەگە وسەدى. ياعني وڭىرگە بايلانىستى ايىرماشىلىق بولادى. جالپى، جىلۋ ەنەرگياسىن ۇنەمدەۋ قادامدارىن ىنتالاندىرامىز، - دەگەن ەدى مينيستر.
"ادىرنا" ۇلتتىق پورتالى
